არსებული ინფორმაციით, ”რესპუბლიკელი” მინისტრები თანამდებობიდან გათავისუფლდნენ. წინასწარი ინფორმაციით, თანამდებობებს დატოვებენ შემდეგი მინისტრები: თავდაცვის მინისტრი თინათინ ხიდაშელი -მის ადგილზე კი ირაკლი სესიაშვილი სახელდება.

თანამდებობას ტოვებს გარემოსა და ბუნებრივი რესურსების დაცვის მინისტრი გიგლა აგულაშვილი მას სავარაუდოდ ნინო სულხანიშვილი ჩაანაცვლებს.

შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილს კი ისი მოადგილე ქეთევან ციხელაშვილი ჩაანაცვლებს.

სახელდება კიდევ ერთი მინისტრის თამარ სანიკიძის გვარიც, რომელსაც მედიის ინფორმაციით, მაია მიმინოშვილი ჩაანაცვლებს.

“რესპუბლიკელი” მინისტრების თანამდებობიდან შესაძლო გათავისუფლების თაობაზე კომენტარი გააკეთა ლევან ბერძენიშვილმა.

მისი თქმით, ამ საკითხზე "მსხვილმა რესპუბლიკელებმა” არაფერი იციან.

“მსგავსი რამ მოსალოდნელი არ არის იმდენად, რამდენადაც ჩვენ, “რესპუბლიკელებმა” ამის შესახებ არაფერი ვიცით. შეიძლება ვინმემ რაიმე იცის, მაგრამ მე არ ვიცი და ძალიან მსხვილმა “რესპუბლიკელებმა” არ იციან და არა მგონია რაიმე უჩვენოდ ხდებოდეს” - აცხადებს ლევან ბერძენიშვილი.

"ნიუპოსტი"თავდცვის სამინისტროს პრესსამსახურს ხელმძღვანელსაც დაუკავშირდა. იმედა დარსალიას თქმით, თინა ხიდაშელი თანამდებობიდან წასვლას არ გეგმავს.

"მე მხოლოდ შემიძლია გითხრათ თავდაცვის მინისტრზე რომ ადგილზეა და შეხვედრებს მართავს . კანცელარიამ გააკეთა განცხადება რომ მსგავსი არაფერი იგეგმება, ეს სახელმწიფო კანცელარიამაც დაადასტურა"- აღნიშნა პრესსამსახურმა.

მოსალოდნელ საკადრო ცვლილებებს არ ადასტურებს რესპუბლიკური პარტიის თავმჯდომარე, ხათუნა სამნიძეც.

"არასწორია ეს ინფორმაცია"- აცნობა "ნიუპოსტს" სამნიძემ.