აპც "გირჩი" 16 აპრილს ფილარმონიაში ყრილობას გამართავს

პოლიტიკა - 17:39, 05 Apr, 2016

1243

ახალი პოლიტიკური ცენტრის გირჩის ყრილობა 16 მარტს თბილისის დიდ საკონცერტო დარბაზში გაიმართება.

ზურაბ ჯაფარიძის განცხადებით მოვიდა დრო, რომ ახალი პოლიტიკური ცენტრი პარტიად იქცეს. მისი თქმით პარტია ძირითადად ფოკუსირებული იქნება ეკონომიკურ პრობლემებზე, რადგან სწორედ ეკონომიკური პრობლემებია ქვეყნის მთავარი გამოწვევა.

„ჩვენ ვიბრძვით იმისთვის, რომ მთავრობამ ფლანგოს რაც შეიძლება ცოტა ფული და ეკონომიკას მიეცეს საშუალება სწრაფად განვითარდეს. ჩვენ ვიბრძვით იმისთვის, რომ ქვეყანაში გაუქმდეს სავალდებულო სამხედრო სამსახური და სახელმწიფო არ აიძულებდეს ახალგაზრდებს დაკარგონ თავიანთი ცხოვრების ერთი წელი სრულიად უაზროდ და უშინაარსოდ და ამ ქვეყანაში ახალგაზრდებმა არ იცხოვრონ მუდმივ შიშში, რომ ვიღაცა ხელს მოკიდებს და წაიყვანს და სადღაც ყარაულად დააყენებს. ჩვენ ვიბრძვით იმისთვის, რომ ნარკოტიკების მოხმარების გამო ადამიანებს ციხეში აღარ სვამდნენ. ჩვენ ვიბრძვით იმისთვის, რომ მიწა დაუკანონდეთ მის ტრადიციულ მფლობელებს და ადამიანებს არ ჰქოდეთ იმის შიში, რომ ერთ დღეს სახელმწიფო მათ მიწას ჩამოართმევს.“- განაცხადა ზურაბ ჯაფარიძემ.

ახალი პარტიის ლიდერი თავად ზურაბ ჯაფარიძე იქნება. ახალი პოლიტიკური ცენტრი არჩევნებში მონაწილეობას დამოუკიდებლად გეგმავს და ამ ეტაპზე კოალიციურ გაერთიანებას არ განიხილავს, თუმცა თანამშრომლობისთვის მზადყოფნას აცხადებს.

„ვისაც სჯერა, რომ ჩვენი შვილებისთვის უკეთესი მომავალი უნდა დავტოვოთ და ჩვენი შვილები იმსახურებენ უკეთეს შესაძლებლობებს, შანსს, რომ იცხოვრონ თანამედროვე, განვითარებულ ქვეყანაში, მობრძანდით ყველა ერთად ფილარმონიაში 16 აპრილს 15:00 საათზე. ყველამ ერთად დავაფუძნოთ ახალი პოლიტიკური ცენტრი და საბოლოო ჯამში, წელს, ოქტომბრის საპარლამენტო არჩევნებში ყველამ ერთად ვიბრძოლოთ ამ ქვეყნის და ჩვენი შვილების უკეთესი მომავლისთვის“- აღნიშნა ჯაფარიძემ.

შეგახსენებთ, ახალი პოლიტიკური ცენტრი „გირჩის“ დამფუძნებლები ზურაბ ჯაფარიძე, გოგა ხაჩიძე, პავლე კუბლაშვილი და გიორგი მელაძე არიან, მომავალ საპარლამენტო არჩევნებში მონაწილეობის მიღებას ხაჩიძე, კუბლაშვილი და მელაძე აღარ აპირებენ.