"მედიის კონტროლის წინასწარ გათვლილი გეგმა" - მამუკა ღლონტი და ეკა აკობია განცხადებას ავრცელებენ

პოლიტიკა - 13:51, 05 Apr, 2016

1494

მაესტროში განვითარებულ მოვლენებთან დაკავშირებით „მაესტროს" მეწილეებმა - მამუკა ღლონტმა და ეკა აკობიამ განცხადება გაავრცელეს:

„მაესტროს" ირგვლივ მიმდინარე პროცესი მედიის საქმიანიობაში ჩარევის, მისი კონტროლის სრულიად არაკანონიერი, წინასწარ დაგეგმილი და გათვლილი გეგმის შედეგია. ყველა ის ნაბიჯი, რომელიც ამჟამად იდგმება ტელეკომპანიის სხვა პარტნიორების მხრიდან, მათ შორის, საკადრო ცვლილებები მენეჯმენტში, ჩვენთვის არ წარმოადგენს სასურველ და ერთადერთ გამოსავალს შექმნილი ვითარებიდან. ჩვენ არ ვეთანხმებით ტელევიზიის დირექტორის პოსტზე წარმოდგენილ კანდიდატურას. ჩვენს ამგვარ პოზიციას საფუძვლად უდევს არა პიროვნული, თუ პროფესიული შეფასების კრიტერიუმები, არამედ არასამართლიანი გარემო, რომლის ფონზეც ვითარდება მოვლენები და ამ გარემოს მთავარი აქტორები - მედიის კონტროლით დაინტერესებული სახელისუფლებო ძალები, ვისი უშუალო მცდელობითა და ძალადობრივი მეთოდებითაც ხდება ტელეკომპანიის მიტაცება. ამჟამინდელი რეალობა კომპანიის ერთ მეწილეს საკონტროლო პაკეტის მფლობელის სტატუსით წარმოგვიდგენს, მეორეს კი მოვლენებზე გავლენის მოხდენის საშუალებას ართმევს. ჩვენ ვაგრძელებთ ბრძოლას სამართლებრივი გზით და ეს ბრძოლა არ შეწყდება, რამდენი დრო და ენერგიაც არ უნდა დასჭირდეს იმ უკანონობის დამტკიცებას და ძალადობის შენიღბული მეთოდების გამოვლენას, რასაც ამჯერად ვადევნებთ თვალს. ჩვენ არ გაგვაჩნია წილების, შესაბამისად ხმების, საკმარისი რაოდენობა იმისათვის, რომ შევცვალოთ ეს რეალობა, თუმცა გაგვაჩნია მთავარი- უდიდესი მოთმინება და უსამართლობასთან ბრძოლის დაუმორჩილებელი სურვილი!“- აღნიშნულია ღლონტი-აკობიას განცხადებაში.

შეგახსენებთ, მაესტროს ახალი გენერალური დირექტორი ზურაბ ნაყეური გახდა, მის კანდიდატურას პარტნიორთა კრებამ 80%-ით 20%-ის წინააღმდეგ დაუჭირა მხარი. ნაყეურს მხარი არ დაუჭირეს მამუკა ღლონტის და ეკა აკობიას წარმომადგენლებმა.