მთიან ყარაბაღში განვითარებულ მოვლენებზე თინა ხიდაშელმა კომენტარი გააკეთა. თავდაცვის მინისტრმა აღნიშნა, რომ ის ორივე კოლეგასთან ინტენსიურ კომუნიკაციის რეჟიმშია.

„ჩვენ ინტენსიური კომუნიკაცია გვაქვს ორივე მეზობელთან. ამ სამი დღის განმავლობაში თავდაცვის სამინისტრო ყველა დონეზე მუდმივ კომუნიკაციაში ვართ, ვცდილობთ, რომ ინფორმირებულნი ვიყოთ“, - განაცხადა თინა ხიდაშელმა.

თავდაცვის სამინისტროს ოფიციალური ინფორმაციით, თინათინ ხიდაშელმა იმედი გამოთქვა, რომ ცეცხლის შეწყვეტა შესაძლებელი გახდება და პროცესი მოლაპარაკებების მაგიდასთან დაბრუნდება.

მინისტრის განცხადებით, რეგიონში სტაბილურობა საქართველოსთვის სასიცოცხლოდ მნიშვნელოვანია და საერთაშორისო თანამეგობრობამ ვითარების დეესკალაციისთვის ყველა საშუალება უნდა გამოიყენოს.