ბირთვული უსაფრთხოების სამიტის ფარგლებში საქართველოს პრეზიდენტი ევროპელ ლიდერებს შეხვდა. ვიზიტის ფარგლებში არსებული შეხვედრები ჟურნალისტებთან საქართველოს საგარეო საქმეთა მინისტრის პირველმა მოადგილემ, დავით ზალკალიანმა შეაჯამა.

ზალკალიანმა აღნიშნა, რომ მათ მყარი გარანტიები მიიღეს იმის შესახებ, რომ საქართველოს ვიზალიბერალიზაციის საკითხში არავითარი დაბრკოლება არ ემუქრება:

„მე განსაკუთრებით გამოვყოფდი ევროპის საბჭოს პრეზიდენტთან, ბატონ დონალდ ტუსკთან და ქალბატონ მოგერინისთან შეხვედრას, სადაც ერთ-ერთი მთავარი თემა იყო საქართველოს ევროკავშირში ინტეგრაციის პროცესი, ჩვენი ევროპელი პარტნიორები უაღრესად დადებითად აფასებენ იმ პროცესს, რომელიც საქართველომ გაიარა და კიდევ ერთხელ, ჩვენ მივიღეთ მყარი გარანტიები მათი მხრიდან, რომ სავიზო ლიბერალიზაციის კუთხით, საქართველოს არანაირი დაბრკოლება არ ემუქრება“, - განაცხადა დავით ზალკალიანმა.