4 აპრილს საქართველოში NATO-ს კვირეული დაიწყება

პოლიტიკა - 14:45, 01 Apr, 2016

1506

ნატოს კვირეული 4 აპრილს, ნატო-საქართველოს სახალხო დიპლომატიის ფორუმით დაიწყება. მას საქართველოს პრემიერ-მინისტრი გიორგი კვირიკაშვილი გახსნის. სახალხო დიპლომატიის ფორუმი საქართველოში პირველად ტარდება. ფორუმში მონაწილეობას აგრეთვე მიიღებენ საქართველოს პრეზიდენტი გიორგი მარგველაშვილი, ნატოს გენერალური მდივნის მოადგილის თანაშემწე ტედ ვაითსაიდი, აშშ-ს სახელმწიფო მდივნის მოადგილის თანაშემწე ბენჟამენ ზიფი, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე და საქართველოს თავდაცვის მინისტრი თინათინ ხიდაშელი და სხვა უცხოელი და ქართველი ექსპერტები. ფორუმზე სახალხო დიპლომატიის და კომუნიკაციის სფეროში არსებულ უახლეს ტენდენციებსა და გამოწვევებზე იმსჯელებენ.
ნატოს კვირეული 19 აპრილამდე გაგრძელდება. დედაქალაქსა და რეგიონებში დაგეგმილია სხვადასხვა ტიპის ღონისძიება, მათ შორის, ორდღიანი სემინარი სამცხე-ჯავახეთის რეგიონის ეთნიკური უმცირესობების წარმომადგენელი პედაგოგებისთვის, საინფორმაციო ცენტრის ახალქალაქის რეგიონული ოფისის გახსნა, პროექტი „ერთი დღე ჯარში“, მედია საშუალებების წარმომადგენლებისთვის. სამხრეთ კალიფორნიის უნივერსიტეტის პროფესორის, ჟურნალისტიკის სკოლის ვიცე-დეკანის შეხვედრა ჟურნალისტიკის ფაკულტეტის სტუდენტებთან, ნატოსა და ევროკავშირის აუდიტორიების გახსნა უნივერსიტეტებში, 2008 წლის აგვისტოს ომსა და ISAF-ის მისიაში დაღუპული სამხედრო მოსამსახურეების შვილების ნახატების გამოფენა და სხვა. ასევე, საჯარო ლექციები, კონკურსები, კონფერენციები, დებატები, გამწვანების აქციები და სპორტული ღონისძიებები.
ნატოს კვირეული საქართველოში წელს მეცხრედ ტარდება. ღონისძიება სსიპ "ნატოსა და ევროკავშირის შესახებ საინფორმაციო ცენტრის" ორგანიზებით და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის, თავდაცვის სამინისტროს, საქართველოში ნატოს სამეკავშირეო ოფისისა და რუმინეთის საელჩოს მხარდაჭერით ხორციელდება.