,,პარტნიორი ქვეყნებისა და რუსეთის სპეცსამსახურების ერთ სიბრტყეზე დაყენება არაპროფესიონალიზმის გამოვლინებაა“

,,პარტნიორი ქვეყნებისა და რუსეთის სპეცსამსახურების ერთ სიბრტყეზე დაყენება არაპროფესიონალიზმის გამოვლინებაა“ - პაატა გაფრინდაშვილი

პოლიტიკა - 18:52, 30 Mar, 2016

1587

სახელმწიფო უსაფრთხოების სამსახურის ხელმძღვანელის ვახტანგ გომელაურის განცხადებას რომლის მიხედვითაც საქართველოში არა მხოლოდ რუსული სპეცსამსახურები, არამედ ,,სხვა ჩვენი მეზობელი თუ არამეზობელი ქვეყნების სპეცსამსახურებია შემოსული და მუშაობენ“ ექსპერტთა მხრიდან კრიტიკული შეფასებები მოჰყვა.

არასამთავრობო ორგანიზაცია „საქართველოს რეფორმების ასოციაციის“ წევრი - ექსპერტი პაატა გაფრინდაშვილი ,,ნიუპოსტთან" საუბარში მტერი სახელმწიფოს - რუსეთის სპეცსამსახურებისა და პარტნიორი ქვეყნების სპეცსამსახურების ერთ სიბრტყეზე დაყენებას არაპროფესიონალიზმის გამოვლინებად აფასებს.

"დეტალებში თუ შევალთ, რამდენიმე წელია უკვე ვსაუბრობთ, რომ გარდა ოკუპაციისა და რუსული ანექსიისა ე.წ რუსული რბილი ძალა გაზრდილია ჩვენს ქვეყანაში. ეს გამოიხატება არაერთი პროპაგანდისტული, სოკოებივით გამრავლებული პრორუსული მედიისა თუ ე.წ არასამთავრობო ორგანიზაციების წარმოქმნაში. პოლიტიკურ განცხადებებს თავი რომ დავანებოთ, არაერთი სარწმუნო კვლევა დაიდო, რომ პრორუსული ძალები, ორგანიზაციები და მედიასაშუალებები რუსულ ფინანსების გარდა, საქართველოს მთავრობიდანაც ფინანსდებიან. ამიტომ რუსული პროპაგანდის ფონის მომატების არჩევნებთან დაკავშირება მინიმუმ არაპროფესიონალიზმია."- განუცხადა "ნიუპოსტს" გაფრინდაშვილმა.

მისი თქმით გომელაურს დღეს რუსული გავლენის გაზრდის შესახებ გაკეთებული განცხადების პარალელურად ამ ძალებთან გამკლავების გზებზეც უნდა ესაუბრა.

"როცა ამბობ, რომ საარჩევნოდ იზრდება რუსული გავლენა და ეს იცი, სწორედ ამ დროს უნდა გაზარდო ძალისხმევა, რომ მისი მინიმალიზება მოახდინო. ამ მიმართულებით რა ნაბიჯებია გადადგმული პირადად მე არ მომისმენია. არც ის გამიგია, რომ იმ რბილი ძალის წინააღმდეგ რაიმე ნაბიჯი გადადგმულიყო. რაც შეეხება განცხადების მეორე ნაწილს, რომლის მიხედვითაც, საქართველოში არამარტო რუსული, არამედ სხვა ქვეყნების სპეცსამსახურებიცაა შემოსული - ისეთი შთაბეჭდილება დამრჩა, რომ დღეს ლექციაზე ვიყავით და ზოგად კურსს გვიკითხავდნენ, რომ ამა თუ იმ ქვეყანაში სხვადასხვა სპეცსამსახურები მოქმედებენ, ეს გასაგებია, თუმცა ამის ერთ სიბრტყეზე მოქცევა და არაფრის თქმა, იმის შესახებ, თუ რა გზით ხდება ამ საფრთხეების განეიტრალება არასერიოზულია. ამ მიმართულებით, მეტი ინფორმაციაა საჭირო. თეორიულადაც რომ დაუშვათ, სხვა ქვეყნების სპეცსამსახურების არსებობა საქართველოში, ჩვენ რუსული სპეცსამსახურების "მოღვაწეობა" ცუდად გვახსოვს, მათ შორის ჩვენს ტერიტორიაზე ტერაქტების მოწყობით. კიდევ ერთხელ ვამბობ, როცა საუბრობ არჩევნების კონტექსტში სპეცსამსახურების გააქტიურებაზე მოსალოდნელ საფრთხეებზე, მაშინ მკაფიო განცხადება უნდა გააკეთო იმაზე, რა ნაბიჯები იდგმევა ამ საფრთხეების განეიტრალებისთვის. ჩვენი პარტნიორი ქვეყნების სპეცსამსახურის წარმომადგენლებთან, თუ კი ისინი ჩვენს ქვეყანაში არიან, თანამშრომლობას ველოდები, რაც შეეხება მტრული სახელმწიფოს, რუსეთის სპეცსამსახურის გააქტიურებას აბსოლუტურად არაპროფესიონალურია მათ ერთ სიბრტყეში დაყენება"- განმარტა გაფრინდაშვილმა.