ოქრუაშვილის ინიციატივა-სოფლად მცხოვრებ ბავშვებს გორის ბაგა-ბაღებს დაატოვებინებენ

პოლიტიკა - 15:19, 30 Mar, 2016

3852

ახალი სასწავლო წლიდან გორის ბაგა-ბაღებში სოფლად მცხოვრებ ბავშვებს სწავლა შესაძლოა აეკრძალოთ, ამის შესახებ ,,ნიუპოსტის" კორესპონდენტი იტყობინება. ინიციატივა, რომელსაც გორის საკრებულოს დეპუტატები პირველ აპრილს იმსჯელებენ საკრებულოს თავმჯდომარის ახალ მრჩეველს ირაკლი ოქრუაშვილს ეკუთვნის. ინიციატივის თანახმად სოფელში რეგისტრირებულ ბავშვს გორის ბაგა-ბაღში აღარ მიიღებენ და მათ სკოკლამდელი განათლების მიღება, სოფლებში მოქმედ ბაგა-ბაღებში მოუწევთ. ინიციატივის შინაარს გორის საკრებულოს თავმჯდომარე ილია მეტრეველი განმარტავს, ის აღნიშნული ცვლილების საჭიროებას მხოლოდ იმიტომ ხედავს, რომ გორის ბიუჯეტს სოფლებიდან ჩამოსული ბავშვების დაფინანსება ზედმეტ ტვირთად აწევს. მეტრეველი მიიჩნევს, რომ რაიონში მცხოვრები ბავშვების სკოლამდელი განათლება, გორის მუნიციპალიტეტის გამგეობამ უნდა უზრუნველყოს. მეტრეველის მოსაზრებას არ იზიარებს გორის მუნიციპალიტეტის გამგებელი, დავით ონიაშვილი სოფლიდან ჩამოსული ბავშვების დაფინანსებას არ გეგმავს. ამბობს, რომ მერიამ აღსაზრდელების დასაფინანსებლად საჭირო თანხა ცენტრალური ბიუჯეტიდან უკვე მიიღო. ახლგაზრდა იურისტთა ასოციაციის გორის ორგანიზაციაში ამბობენ რომ ახალი პროექტი კანონს პირდაპირი წესით არ ეწინააღმდეგება თუმცა განმარტავენ რომ ამ თემაზე გადაწყვეტილების მიღება მოსახლეობის ინტერესებიდან გამომდინარე უნდა მოხდეს. პროექტის დამტკიცების შემთხვევაში გორის მუნიციპალიტეტის სოფლებში მცხოვრები ბავშვები რომლებიც სკოლამდელ განათლებას ქალაქის საბავშვო ბაღებში იღებენ, დაფინანსებას 1 სექტემბრამდე მიიღებენ. შემდეგ კი მათი დაფინანსება მშობლების იურიდიული მისამართის მიხედვით მოხდება. დღევანდელი მონაცემებით ქალაქში სულ 18 მუნიციპალური ბაღი ფუნქციონირებს და მასში 3 ათას 400- მდე აღსაზრდელი სწავლობს აქედან 600 კი სოფლებშია რეგისტრირებული.