სოციალური პრობლემები ბორჯომსა და ბაკურიანში - ალასანია მოსახლეობასთან შეხვედრებს განაგრძობს

პოლიტიკა - 15:58, 29 Mar, 2016

1404

დღეს, ‘’თავისუფალი დემოკრატების’’ ლიდერები ირაკლი ალასანია, ირაკლი ჩიქოვანი, თამარ კეკენაძე და თამაზ შიოშვილი ბორჯომში იმყოფებოდნენ. ლიდერები ძველი ინფექციურის საავადმყოფოში მაცხოვრებლებს შეხვდნენ. სახელმწიფოს კუთვნილ შენობაში 19 ოჯახი სხვადასხვა მიზეზების გამო ცხოვრობს. ზოგიერთ მათგანს სოციალური პრობლემა აქვს, ზოგსაც მეწყერმა სახლები დაუნგრია. წელიწადზე მეტია სოციალურად დაუცველი ოჯახები, ომის მონაწილეები, საერთაშორისო მისიებში ნაბრძოლი ჩვენი თანამოქალაქეები, მრავალშვილიანი ოჯახები ცხოვრობენ ყოველგვარი კომუნალური პირობების გარეშე. არ აქვთ წყალი, დენი და გაზი. სახელმწიფო არ აღიარებს მათ უფლებებს და არ უკანონებს არსებულ ფართს, რომელშიც ცხოვრობენ. მაცხოვრებლები გამოსახლების საშიშროების წინ დგანან. მათ ყურადღებას არ აქცევს არც ადგილობრივი და არც ცენტრალური მთავრობა. ‘’თავისუფალი დემოკრატების’’ ლიდერებმა ძველ ინფექციურის საავადმყოფოში მაცხოვრებლებს დეტალურად გააცნეს სოციალური დახმარებების არსებულ სისტემა და მისი გაუმჯობესების გზები. მოგვიანებით, ‘’თავისუფალი დემოკრატების’’ ლიდერები ბაკურიანის ხიდთან დახურულ ბაზარში და მოედანთან არსებულ ღია ბაზარში შეხვდნენ მოვაჭრეებს. მათი მთავარი პრობლემა ბანკის და კერძო პირების ვალებია. მოვაჭრეების ინფორმაციით, კატასტროფულად შემცირებულია ვაჭრობა, მოსახლეობას საჭმლის საყიდელი ფული არ აქვს. ისინი უკეთეს სავაჭრო წერტილებს და სათანადო პირობებს ითხოვენ. რამდენიმე წლის წინ გარე მოვაჭრეები დახურულ ბაზარში ვაჭრობდნენ, რომლიდანაც გამგეობამ გამოდევნა. მოვაჭრეები პრობლემების მოგვარებას ხელისუფლებისგან უიმედოდ ითხოვენ. ირაკლი ალასანიამ და თავისუფალი დემოკრატების სხვა ლიდერებმა მოვაჭრეებს პრობლემების მოგვარების ხედვა შესთავაზეს და სისტემაში გასატარებელი რეფორმები გააცნეს. „თავისუფალი დემოკრატების“ ლიდერმა ირაკლი ალასანიამ დეტალურად ისაუბრა ახალ ინიციატივაზე, რომელიც უიმედო ვალების ჩამოწერას ითვალისწინებს.