"ზღვა ხალხს ეკუთვნის და არა ივანიშვილს"

"ზღვა ხალხს ეკუთვნის და არა ივანიშვილს" - აქცია განმუხურში

პოლიტიკა - 15:04, 25 Mar, 2016

2589

განმუხურში, ადგილობრივებმა ბულვარის ტერიტორიის აუქციონზე გატანის ფაქტი გააპროტესტეს. ადგილზე შეკრებილი მოსახლეობა "ნიუპოსტთან" აცხადებს, რომ "ბიძინა ივანიშვილს საქართველოს ყიდვის შესაძლებლობას არ მისცემენ".
"ზღვა ხალხს ეკუთვნის და არა ბიძინას" - ამბობს აქციის ერთ-ერთი მონაწილე.
მისი თქმით, განმუხურში საკმარისია ტერიტორია, და არ არის აუცილებელი ზღვის სანაპირო ზოლის და ბულვარის მიმდებარე ტერიტორიის გაყიდვა.

ადგილზე იმყოფებიან „ერთიანი ნაციონალური მოძრაობის“ წარმომადგენლებიც. მათი განმარტებით, ინვესტიციების წინააღმდეგი არავინ არ არის, მაგრამ ასე ხელაღებით ამ ტერიტორიების გაყიდვა არ შეიძლება.

"ნაციონალური მოძრაობის" ზუგდიდის ოფისის წარმომადგენლების განცხადებით, განმუხურის სანაპირო ყოფილი პრემიერ-მინისტრის, ბიძინა ივანიშვილის ინტერესებს ეწირება.

ენმ-ს წევრის განცხადებით, აღნიშნული ტერიტორის 33 951.00 კვ.მ აუქციონის წესით იყიდება. საწყისი ფასი 2 263500 ლარია.

ენმ-ს ცნობით, ტერიტორიაზე სამშენებლო ნებართვის მიღებიდან არაუმეტეს 36 თვის ვადაში, 120 ნომრის მქონე სასტუმრო კომპლექსი უნდა აშენდეს, მყიდველმა არანაკლებ 10 000 000 ლარის ოდენობის ინვესტიცია უნდა განახორციელოს.