რა პასუხი აქვს ბაღების მართვის სააგენტოს თორდინავას მოსალოდნელ გათავისუფლებაზე

პოლიტიკა - 13:10, 25 Mar, 2016

1154

თბილისის ბაღების მართვის სააგენტოში უწყების ხელმძღვანელის მოსალოდნელ გადადგომის ფაქტს არ ადასტურებენ.

როგორც "ნიუპოსტს სააგენტოს პრესსამსახურის წარმომადგენელმა თიკო კვირტიამ განუცხადა, თემურ თორდინავას მოსალოდნელი გადადგომის ფაქტს არ ფლობს.

"ამ ინფორმაციას არ ვფლობ, ბატონი თემური ჩვეულ რეჟიმში მუშაობს. ის ამჟამად საკრებულოში ფრაქცია რესპუბლიკელებთან შეხვედრაზე იმყოფება"- გვითხრა პრესსამსახურმა.

კვირტიამ ჩვენთან საუბრისას უარყო ინფორმაცია, რომ თორდინავას უწყების მონიტორინგის სამსახურის და კადრების განყოფილების უფროსები გაათავისუფლეს.

პრესსამსახურის მტკიცებით, ყველა თანამშრომელმა თანამდებობა პირადი განცხადების საფუძველზე დატოვა.

"არავინ გაუთავისუფლებიათ, მათ თანამდებობა საკუთარი სურვილით დატოვეს"- აღნიშნა თიკო კვირტიამ.

რაც შეეხება მაია ქობალიას კადრს. თბილისის ბაღების მართვის სააგენტოში აცხადებენ, რომ ეს უკანასკნელი დროებით იკავებდა თორდინავას მოადგილეს პოსტს.

პრესსამსახურისთვის უცნობია ამ ეტაპზე რა თანამდებობა უჭირავს ქობალიას.

"ნიუპოსტის" ინფორმაციით, თორდინავა სააგენტოს თავმჯდომარის პოზიციიდან გათავისუფლდება. თემურ თორდინავა დედაქალაქის მერის, დავით ნარმანიას ნათესავია, თუმცა ნაკლებად სავარაუდოა, რომ მას მერთან ნათესაურმა კავშირმა უშველოს. როგორც ამბობენ, თორდინავას სწორედ დირექტორების სკანდალს გადააყოლებენ და მერიაში ნარმანიას გარემოცვა კიდევ ერთი კადრით შემცირდება.