ფატუ ბენსუდა აგვისტოს ომის გამოძიების შესახებ Guardian-ში სტატიას აქვეყნებს

პოლიტიკა - 17:17, 24 Mar, 2016

1730

"რუსეთ-საქართველოს ომი: რატომ დაიწყო სისხლის სამართლის საერთაშორისო სასამართლომ ომის დანაშაულის გამოძიება" - ამ სათაურ აქვეყნებს სტატიას „გარდიანში“ ჰააგის სისხლის სამართლის საერთაშორისო სასამართლოს პროკურორი ფატუ ბენსუდა და გამოძიების აუცილებლობაზე საუბრობს.

ფატუ ბენსუდას თქმით, აგვისტოს ომის შედეგად დაიღუპა ან დაშავდა ასობით ადამიანი , ათასობით ადამიანი კი იძულებით გადაადგილებული პირი გახდა. მისი თქმით, ქართული და რუსული მხარეები გამოძიებას ატარებდნენ, თუმცა იმასაც აღნიშნავს, რომ ე.წ. სამხრეთ ოსეთსა და მის მიმდებარე ტერიტორიაზე უსაფრთხოების არასტაბილური ვითარების გამო, საქართველოში გამოძიების პროცესი შეჩერდა.

ჰააგის სისხლის სამართლის საერთაშორისო სასამართლოს პროკურორის თქმით, გასული წლის მარტში საქართველოს ხელისუფლებამ აცნობა, რომ 2008 წლის მოვლენებზე შიდა გამოძიების შემდგომი პროგრესის პერსპექტივა არ ჩანდა. რის შემდეგაც, მან სისხლის სამართლის საერთაშორისო სასამართლოს მოსამართლეებს საკუთარი გამოძიების ჩატარების თხოვნით მიმართა.

"ამ ეტაპზე მტკიცებულებუბების მოპოვება ხდება. თუკი მტკიცებულებები მოგვცემს იმის გონივრულ საფუძველს, რომ პირმა კაცობრიობის წინაშე და ომის დანაშაული ჩაიდინა , მაშინ დაიწყება შემდეგი ეტაპი - მივმართავთ სისხლის სამართლის საერთაშორისო სასამართლოს, დაკავების ორდერის ან სასამართლოში გამოცხადების შესახებ ბრძანების გაცემის შესახებ" - წერს ბენსუდა.

ბენსუდას თქმით, გამოძიება არ ეხება პოლიტიკური უთანხმოებების მოგვარებას, "სამხრეთ ოსეთის" სტატუსის განსაზღვრას, ან ვინმესთვის პასუხისმგებლობის დაკისრებას სამხედრო მოქმედებების დაწყებისთვის. პროკურორის თქმით, გამოძიება არის დამოუკიდებელი იურიდიული პროცესი.