რეფორმების ოთხპუნქტიანი გეგმის შესრულების ფარგლებში , საქართველოს პრემიერ მინისტრმა განათლების რეფორმის გეგმა განათლების მინისტრთან ერთად სტუდენტებს გააცნო. საუბარი ძირითადად პროფესიული განათლების სფეროში განსახორციელებელ გეგმებს შეეხო

გიორგი კვირიკაშვილის თქმით პროფესიული განათლების ახალი სასწავლო მოდელი სახელმწიფოსა და კერძო სექტორს შორის პარტნიორობით შეიქმნება.

„ქვეყნის ეკონომიკის განვითარების ერთ-ერთი შემაფერხებელი ფაქტორი არის შესაბამისი კვალიფიკაციის მქონე სამუშაო ძალის არარსებობა. სწორედ ამ პრობლემების არსებობის გამო წამოვიწყეთ ეს ინიციატივა, რომ სწორედ შრომის ბაზრიდან წამოსული მოთხოვნების საფუძველზე შედგეს პარტნიორობა სახელმწიფოსა და კერძო სექტორს შორის და ამ პარტნიორობით შეიქმნას ახალი სასწავლო მოდელი. პარტნიორობა არ გულისხმობს რაიმე ტიპის თავს მოხვეულ ინიციატივას სახელმწიფოს მხრიდან კერძო სექტორის მიმართ. ეს არის პროცესი, რომელიდანაც სარგებელს ყველა მხარე ღებულობს“- განაცხადა გიორგი კვირიკაშვილმა

განათლების მინისტრის თქმით მნიშვნელოვანია, რომ პროფესიულ განათლებაში საჯარო სექტორის ჩართვა მაქსიმალურად მოხდეს. აღნიშნული რეფორმის ფარგლებში კი პროფესიული განათლების ძირითადი სასწავლო პროცესი საწარმოში განხორციელდება. თეორიული და საბაზო მოდულების შესწავლა კი კოლეჯში.

„კოლეჯის ადმინისტრაციულ ხარჯებს დაფარავს სახელმწიფო, ხოლო სტუდენტის სასწავლო ხარჯები იყოფა კოლეჯსა და საწარმოს შორის“- განაცხადა სანიკიძემ.

განათლების რეფორმის პირველი ეტაპი ითვალისწინებს შესაბამისი ღონისძიებების განხორციელებას პროფესიულ განათლებაში, მე-2 და მე-3 ეტაპზე რეფორმა კი გულისხმობს უმაღლესი განათლების სფეროს და საშუალო განათლების მიმართულების რეფორმას.