საქართველოს თავდაცვის მინისტრი თინათინ ხიდაშელი თავდაცვის სამინისტროს სპეციალურ წარმომადგენელს გაეროში მირიან ფოფხაძეს შეხვდა. მირიან ფოფხაძე თავდაცვის მინისტრმა ცენტრალური აფრიკის რესპუბლიკაში 2014 წლის შემოდგომის მისიის საქმესთან დაკავშირებით თბილისში სპეციალურად გამოიძახა. თავდაცვის სამინისტროს სპეციალურმა წარმომადგენელმა თინათინ ხიდაშელს აფრიკაში საგამოძიებო ჯგუფის გამგზავრებასთან დაკავშირებით კონკრეტული დეტალები და პროცედურები გააცნო.

ამ დროისთვის უკვე შერჩეულნი არიან დამოუკიდებელი საერთაშორისო ჰუმანიტარული და ომის სამართლის ექსპერტები, რომლებიც ცენტრალურ აფრიკაში საგამოძიებო მოქმედებების ჩასატარებლად საგამოძიებო ჯგუფის წევრების სტატუსით გაემგზავრებიან. საგამოძიებო ჯგუფის ვიზიტის თარიღი გაეროს წარმომადგენლების მიერ დაზუსტდება.

თავდაცვის მინისტრის განცხადებით ძალიან მნიშვნელოვანია, ქართველი სამხედროების სახელი იყოს ზუსტად ისეთივე უმწიკვლო, როგორც მათი საბრძოლო მოქმედებაა სამშვიდობო მისიებზე. სწორედ ამიტომ საქართველო აქტიურად არის საგამოძიებო პროცედურებში ჩართული.

„სამედიცინო პროცედურები თითქმის დაასრულეს, კვირის ბოლოს დაამთავრებენ აცრებს, შემდეგ ორკვირიანი ვადაა საჭირო იმისთვის, რომ ეფექტი ნახონ სამედიცინო პროცედურის და აპრილის შუა რიცხვებში იგეგმება გამგზავრება. საზოგადოებას, როგორც შევპირდით მუდმივად ინფორმირებულს ვამყოფებთ“- განაცხადა თავდაცვის მინისტრმა.

თავდაცვის სამინისტროში გამართულ შეხვედრას ასევე დაესწრნენ თავდაცვის მინისტრის მოადგილე ანა დოლიძე და საერთაშორისო საკითხებში მინისტრის მრჩეველი შოთა ღვინერია. ცენტრალურ აფრიკაში 2014 წლის შემოდგომის მისიასთან დაკავშირებული საქმის გამოძიებას ანა დოლიძე კურირებს.