ბრიუსელში დატრიალებული ტრაგედიის მიუხედავად, ევროპარლამეტში ევრონესტის საპარლამენტო ასამბლეის მეხუთე პლენარული სხდომა მაინც შედგა. დეპუტატებმა წუთიერი დუმილით პატივი მიაგეს დაღუპულთა ხსოვნას. სხდომის გახსნისას, საპარლამენტო ასამბლეის თანა თავმჯდომარეებმა, ვიქტორ დოლიძემ და ჰეიდა ჰაუტალამ ერთობლივი განცხადება გააკეთეს ბრიუსელში მომხდარი ტერორისტული აქტის დაგმობის თაობაზე. დღესვე, ასამბლეამ ნადეჟდა სავჩენკოს განთავისუფლების მხარდამჭერი რეზოლუცია მიიღო, სადაც დაგმობილია რუსეთის აგრესიული ქმედებები და როსტოვის სასამართლოს მიერ მიღებული გადაწყვეტილბა, სავჩენკოს 22 წლით თავისუფლების აღკვეთის თაობაზე.

პლენარულ სხდომაზე პოლიტიკის, ადამიანის უფლებების და დემოკრატიის; ეკონომიკური ინტეგრაციის; საკანონმდებლო ჰარმონიზაციისა და პოლიტიკური დაახლოების; ენერგო უსაფრთხოებისა და სოციალურ საკითხთა, განათლების, კულტურისა და სამოქალაქო საზოგადოების კომიტეტების მიერ მიღებული რეზოლუციები დაამტკიცა. პლენარული სხდომა 23 მარტსაც უნდა გაგრძელებულიყო, რის შემდგომაც ევრონესტის საპარლამენტო ასამბლეის თანაპრეზიდენტების ერთობლივი პრსეკონფერენცია იყო დაგეგმილი, თუმცა ბრიუსელში განვითარებული მოვლენების გამო, ყველა ღონისძიება გაუქმდა და რიგით მეხუთე სესიამ მუშაობა დღეს დაასრულა.

პლენარულ სხდომამდე ევროპარლამენტში ქალთა ფორუმი გაიმართა, სადაც ქალთა გაძლიერებაზე, მშვიდობაზე, თავისუფლებაზე , უსაფრთხოებაზე და ქალების პოლიტიკურ პროცსებში ჩართვაზე იმსჯელეს. როგორც აღინიშნა, მნიშვნელოვანია საუბარი და აზრების გაცვლა იმ საერთო ძალისხმევაზე, რომლითაც ყველა ქვეყანა ცდილობს, გააძლიეროს ქალთა მონაწილეობა პოლიტიკურ სივრცეში. შეხვედრაზე გამოითქვა სურვილი, რომ ქალთა ფორუმმა ერთმანეთს გარკვეული დახმარება გაუწიონ იმ პრობლემების მოგვარებაში, რომელიც თითოეულ ქვეყანას ამ მიმართულებით გააჩნია.

ბრიუსელში 21-22 მარტს გამართულ სხდომებში საქართველოს პარლამენტი ასამბლეის თანაპრეზიდენტის უფლებამოსილებით შეხვდა, სადაც საქართველოს პარლამენტიდან ვიქტორ დოლიძე, გიორგი ვოლსკი, ეკა ბესელია, გუგული მაღრაძე, ანი მიროტაძე, გიორგი ჟორჟოლიანი, ფრიდონ საყვარელიძე, გიორგი ჟვანია, ჩიორა თაქთაქიშვილი, დავით დარჩიაშვილი, თინათინ ბოკუჩავა, გიორგი კანდელაკი და ლევან თარხნიშვილი მონაწილეობდნენ.