„თავისუფალი დემოკრატების“ ლიდერი ირაკლი ალასანია ბრიუსელის ტრაგედიას ეხმაურება. ალასანიას განცხადებით აუცილებელია, რომ საქართველოს სადაზვერვო სისტემები გაძლიერდნენ, რათა მსგავსი საფრთხეების პრევენცია მოხდეს:

„ეს კიდევ ერთხელ ყველას გვანახებს, თუ რამხელა საფრთხის წინაშე დგას მსოფლიო, ჩვენ, როგორც ამ მსოფლიოს ნაწილი. მომხდარი კიდევ ერთხელ ამახვილებს ყურადღებას იმაზე, თუ რამდენად მნიშვნელოვანია გვქონდეს გამართული, ძლიერი სადაზვერვო სამსახურები, იმისთვის, რომ მოვიპოვოთ ინფორმაცია დროულად და პრევენცია გავუკეთოთ ასეთ ტერორისტულ აქტებს. კიდევ ერთხელ სამძიმარს ვუცხადებ ჩვენს ევროპელ მეგობრებს ამ უმძიმეს დღეს და ასევე მინდა ხაზი გავუსვა, რომ საქართველომაც კიდევ უფრო მეტი რესურსი უნდა გამოყოს იმისთვის, რომ ჩვენი სადაზვერვო სამსახურები იყვნენ მოწოდების სიმაღლეებზე და ასეთ საფრთხეებს პრევენცია გაუკეთონ“, - განაცხადა ირაკლი ალასანიამ.