გია ხუხაშვილი აბაშიძის კრიტიკას სამართლიანს უწოდებს, თუმცა ფორმატის გაუქმებას ეწინააღმდეგება

პოლიტიკა - 17:00, 21 Mar, 2016

1320

გია ხუხაშვილი ამბობს, რომ პრემიერის სპეციალურ წარმომადგენელს რუსეთთან ურთიერთობის საკითხებში გრიგორი კარასინის მუქარაზე საჭირო რეაგირება არ მოუხდენია.

როგორც "ნიუპოსტთან" საუბრისას ხუხაშვილმა აღნიშნა სწორედ ამიტომ დაიმსახურა ზურაბ აბაშიძემ კრიტიკა.

"როდესაც ერთი მხრიდან კეთდება მკაცრი განცხადებები მეორე მხრიდანაც უნდა გესმოდეს რეაგირება. ეს არის ლოგიკური და ბუნებრივია, რომ კარასინის მუქარის შემდეგ აბაშიძის დუმილი უკმარისობის გრძნობას იწვევს"- განუცხადა "ნიუპოსტს" ექსპერტმა გია ხუხაშვილმა.

ხუხაშვილი აცხადებს, რომ აბაშიძემ უფრო კონკრეტულად უნდა ახსნას, რას გულისხმობდა პრაღაში გაკეთებულ განცხადებაში („რუსეთთან ურთიერთობის დროს ჭკვიანად უნდა მოვიქცეთ“).

ზოგადად აბაშიძე-კარასინის ფორმატს რაც შეეხება ამ საკითხზე ექსპერტი ამბობს, რომ დიალოგი მტერთან უფრო საჭიროა.

"რაღაც მიღწევები თუნდაც ეკონომიკური თვალსაზრისით არსებობს. ძალიან ბევრი ქართველი მუშაობს რუსეთში. ამასთან ამ ეტაპზე ჩვენი სუსტი ეკონომიკისთვის მნიშვნელოვანია რუსული ბაზარი. ამ შეხვედრაზე რაიმე სახის სისტემური გადაწყვეტილებების მიღება არ ხდება ამიტომ ის არ აზიანებს ჩვენს სახელმწიფოს. პირველ რიგში მტერთან უნდა ვისაუბროთ, მეგობართან საუბრის პრობლემა ისედაც არ არსებობს. თუ ჩვენი პოლიტიკური სტატეგია მშვიდობიანად მოვაგვაროთ რუსეთთან არსებული პრობლემები და ქვეყანა გავამთლიანოთ ბუნებრივია უნდა ვესაუბროთ რუსეთს. ამ ფორმატის გაუქმებაზე საუბარი პოლიტიკურ სპეკულაციად მიმაჩნია"- აღნიშნა ხუხაშვილმა.