„თავისუფალი დემოკრატების“ ლიდერის, ირაკლი ალასანიას განცხადებით, ვეტერანთა ჰოსპიტალი, უკვე სამი თვეა დაფინანსების გარეშე ფუნქციონირებს:

„ნებისმიერი სახელმწიფო და ხელისუფლების სახე ფასდება იმითაც, თუ როგორ უვლის ის საკუთარ ვეტერანებს და როგორ აქვს ვეტერანების სოციალური სტატუსი დაცული. ესენი არიან ხალხი, რომელთაც უნდა ვუმადლოდეთ იმას, რომ დღეს საქართველო დამოუკიდებელია. ისინი იცავდნენ ტერიტორიულ მთლიანობას მრავალ ომში, რომელიც ჰქონდა ჩვენს ქვეყანას. მე მხვდებიან ვეტერანები, რომლებიც ამბობენ, რომ დღეს მათ დიდი საფრთხე ემუქრებათ, ვინაიდან ვეტერანთა ჰოსპიტალი უკვე სამი თვეა დაფინანსების გარეშე ფუნქციონირებს. ვეტერანებს აქვთ ჯანმრთელობის პრობლემები, ჰოსპიტალის ექიმები უკვე სამი თვეა უხელფასოდ მუშაობენ. ეს რეალურად უმწვავესი პრობლემაა და გული მწყდება, რომ 2012 წლის დეკემბერში შექმნილი ერთობლივი კომისია, რომელიც ემსახურებოდა ვეტერანთა საქმეების ორგანიზებას და მათი სოციალური დაცვის საკითხებს, არ მუშაობს და არ ფუნქციონირებს. ფაქტობრივად, ხელისუფლებას ვეტერანთა სოციალური სტატუსის და ვეტერანთა მიმართ არანაირი პოლიტიკა არ აქვს. მოვუწოდებ არა მხოლოდ კონკრეტული უწყების ხელმძღვანელებს, არამედ მთავრობის მეთაურს, გიორგი კვირიკაშვილს დაინტერესდეს ამ საკითხით", - განაცხადა ირაკლი ალასანიამ.