"პრეზიდენტის კრიტიკას ვიზიარებ, კარასინის მუქარისთვის აბაშიძეს ადეკვატურად უნდა ეპასუხა"- ჩიტაძე

პოლიტიკა - 12:57, 21 Mar, 2016

1300

ექსპერტი ნიკა ჩიტაძე იზიარებს საქართველოს პრეზიდენტის გიორგი მარგველაშვილის მიერ რუსეთთან ურთიერთობების საკითხებში პრემიერის სპეციალური წარმოადგენლის მისამართით გამოთქმულ კრიტიკას.

როგორც "ნიუპოსტს" თემის კომენტირებისას ჩიტაძემ განუცხადა, აბაშიძე ვალდებული იყო მკაფიო განცხადებით ეპასუხა რუსეთის საგარეო საქმეთა მინისტრის მოადგილის, გრიგორი კარასინის მუქარისთვის.

"პრეზიდენტის განცხადებას ვიზიარებ, რომელიც ელოდებოდა მკაფიო განცხადებას ბატონი აბაშიძისგან, როდესაც კარასინი ღიად იმუქრება, აცხადებს რომ რუსეთის მოთმინებას აქვს საზღვარი და აქცენტს მოსალოდნელ არჩევნებზე აკეთებს მას უნდა გასცემოდა ადეკვატური პასუხი. მით უფრო რომ ამ მოვლენების კვალდაკვალ სოფელ ჯარიაშენში რუსეთმა გზის გაყვანა დაიწყო და კარასინი იმ კომისიის ხელმძღვანელად დაინიშნა, რომელმაც საზღვრები უნდა დაადგინოს"- აღნიშნა ჩიტაძემ.

მისი თქმით, ზურაბ აბაშიძის განცხადება, რომ „თუ ჭკვიანურად მოვიქცევით არაფერი დაგვემუქრება“ სრულიად უსუსური პოზიცია იყო.

"როცა საქართველოს ტერიტორიების 20 % რუსეთის მიერ არის ოკუპირებული, როცა რუსეთის საგარეო საქმეთა მინისტრის მოადგილე უხეშად ერევა საქართველოს შიდა პოლიტიკაში და აკეთებს განცხადებას ჩვენს ქვეყანაში დაგეგმილ საპარლამენტო არჩევნებზე, გვაკრიტიკებს და იმუქრება ქართულ მხარეს აქვს უფლება დაგმოს ეს განცხადებები, როგორც სუვერენულმა სახელმწიფომ დააფიქსიროს ფაქტი, რომ ქვეყანა ოკუპირებულია. მე არ ვგულისხმობ უხეშობას ეს უნდა გაკეთებულიყო მკაფიო დიპლომატიური განცხადებით"- განუცხადა "ნიუპოსტს" ჩიტაძემ.