,,სამუშაო ჯგუფი შექმნილია და დანარჩენი შედეგზეა დამოკიდებული“ - კაციტაძე პრემიერთან შეხვედრის დეტალებზე

პოლიტიკა - 16:43, 19 Mar, 2016

944

მთავრობის კანცელარიაში პრემიერ მინისტრმა და საარჩევნო საკითხებზე შექმნილ ინტერპარტიულ ჯგუფთან შეხვედრა გამართა. როგორც ,,ახალი მემარჯვენეების“ ლიდერმა ჟურნალისტებთან შეხვედრის დასრულების შემდგ განაცხადა ხელისუფლების მხრიდან წარმოდგენილი სამუშაო ჯგუფი საკმაოდ სოლიდურია. მამუკა კაციტაძე ამბობს, რომ ოპოზიციისა და ხელისუფლების სამუშაო ჯგუფმა კონკრეტული შედეგები 15 აპრილამდე უნდა დადოს.

,,დღევანდელი დღის დანიშნულება რაც იყო, ის ჩვენი მხრიდან შესრულდა. კერძოდ, ჯგუფი შეიქმნა და იმუშავებს იუსტიციის სამინისტროში, ერთგვარი ტექნიკური კოორდინირებით იუსტიციის მინისტრის მხრიდან. განსაზღვრულია საკითხთა წრე, რომელზედაც ჩვენ ვიმსჯელეთ. ჩვენი მხრიდან წარმომადგენლობა გავაცანით, მათ მხრიდან წარმომადგენლობა არის ასეთი, რომ ყველა ფრაქციიდან არის კონკრეტული პიროვნება და პრემიერის ადმინისტრაციიდან საპარლამენტო მდივანი. ვფიქრობ, რომ წარმომადგენლობა საკმაოდ სოლიდურია, დანარჩენი შედეგზეა დამოკიდებულია. ჩვენ შევთანხმდით დრო 15 აპრილამდე, რომ შემდეგ მოესწროს იმპლემენტაცია პარლამენტში, ჩვენ უნდა დავამთავროთ მუშაობა და ვთქვათ, რაზე შევთანხმდით და რაზე ვერა“ - განაცხადა მამუკა კაციტაძემ.

პრემიერთან შეხვედრას ასევე ესწრებოდა საპარლამენტო უმრავლესობის ლიდერი ზვიად კვაჭანტირაძე, იუსტიციის მინისტრი თეა წულუკიანი და დეპუტატები ზვიად ძიძიგური, ზურაბ ტყემალაძე და გია ვოლსკი.

შეხვედრის მიზანი საარჩევნო საკითხებზე მომუშავე ჯგუფის შემადგენლობის დღის წესრიგის და რეგლამენტის დადგენა იყო.