,,ნაციონალური მოძრაობა“ მიწის რეგისტრაციის შესახებ კანონში ცვლილების შეტანას ითხოვს

პოლიტიკა - 13:03, 19 Mar, 2016

1543

"ერთიანი ნაციონალური მოძრაობის" ლიდერმა გიგი წერეთელმა დღეს გამართულ პრესკონფერენციაზე იმ კანონპროექტის დადებით მხარეებზე ისაუბრა, რომელიც პარტიამ პარლამენტში გუშინ წარადგინა და მიწის რეგისტრაციის გამარტივებას შეეხება.

"დღეს კიდევ ერთხელ მინდა შევეხო ჩვენს მიერ ინიცირებულ კანონს - საჯარო რეესტრში ცვლილებების შესახებ, რომელიც საქართველოს პარლამენტმა პირველი მოსმენით გუშინ მოისმინა და რომელიც ჩვენი მოქალაქეებისთვის მართლზომიერების ნორმებში ქონების საკუთრებაში გადაცემას ეხება.

ხელისუფლებას 2 თვის წინ ჰქონდა ვარიანტი, რომელიც პრაქტიკულად მოქალაქეებს ამ საკუთრებას ართმევდა. ანუ, სახელმწიფო საკუთრებაში იღებდა ყველა იმ საკუთრებას, რომელიც საჯარო რეესტრში არ იყო დარეგისტრირებული და მხოლოდ ერთ წელს აძლევდა მოქალაქეს, რომ მოეგვარებინა ეს საკითხი და სახელმწიფოსთან ედავა.

ჩვენი ვარიანტი ამ პროცედურას აადვილებს. რაც ყველაზე მთავარია, ჩვენი კანონპროექტით სახელმწიფო ნახაზით, აზომვითი სამუშაოებს თავისი ხარჯებით აწარმოებს და მოქალაქეს რამდენიმე ასეული ლარის გადახდა არ დასჭირდება. ჩვენ მოვისმინეთ ახალი ვერსია, სადაც საუბარია რომ მთავრობის მხრიდან რაღაცის გამარტივება ხდება, თუმცა ეს კანონპროექტი არავის უნახავს.

ჩვენ მიგვაჩნია, რომ აუცილებელია სახელმწიფომ თანამოქალაქეებისთვის აზომვაც მოახდინოს, ნახაზის გაკეთებაც და რაც შეიძლება სწრაფად გადასცეს საკუთრებაში.

ამ კანონპრეოქტს ჩვენი მოსახლეობის მხრიდან დიდი მხარდაჭერა აქვს, ამიტომ ყველაფერს გავაკეთებთ, რომ ეს პარლამენტმა მიიღოს." - განაცხადა გიგი წერეთელმა.