"ორი ათეული წელია, სამხრეთ ოსეთი საქართველოს მხრიდან აგრესიის მოლოდინშია"

"ორი ათეული წელია, სამხრეთ ოსეთი საქართველოს მხრიდან აგრესიის მოლოდინშია" - თიბილოვი

პოლიტიკა - 13:14, 18 Mar, 2016

2373

ცხინვალის საოკუპაციო რეჟიმის დე ფაქტო ლიდერმა, ლეონიდ თიბილოვმა რუსეთთან ინტეგრაციის შესახებ გამოცემა"კომერსანტისთვის" მიცემულ ინტერვიუში ისაუბრა. მისი თქმით, პატარა ქვეყანას რეგიონში არსებული რყევების პირობებში გადარჩენა მხოლოდ ძლიერი მოკავშირის შემთხვევაში შეუძლია.

„თანამშრომლობისა და ინტეგრაციის შესახებ, გასულ წელს გაფორმებული ხელშეკრულება , ჩვენი ქვეყნების დაახლოების გზაზე ისტორიული ეტაპია. სამხრეთ ოსეთმა რუსეთის სახით მოკავშირე იპოვა. სამხრეთ ოსეთისთვის გარე აგრესიისგან დაცვა - უპირველესი პრიორიტეტია - ორი ათეული წელია სამხრეთ ოსეთი ომის რეჟიმში ან საქართველოს მხრიდან მორიგი აგრესიის მოლოდინში იმყოფება . რუსეთის მოკავშირეობა კი ჩვენთვის უსაფრთხოების ახალი დონეა“ - განაცხადა დე ფაქტო ლიდერმა.

თიბილოვის განცხადებით, 2008 წლის ომის შემდეგ მოსკოვმა ოკუპირებული ცხინვალისთვის სწორი გადაწყვეტილება მიიღო, როცა მისი დამოუკიდებლობა აღიარა.

„რუსეთში შესვლის იდეა ყოველთვის ცოცხლობდა და ცოცხლობს ჩვენს საზოგადოებაში. ჩვენმა ხალხმა აჩვენა დიდი სურვილი, თავგანწირული ბრძოლა თავისუფლებისთვის და საქართველოსგან დამოუკიდებელი არსებობისთვის, რომელიც კვლავ განაგრძობს სამხრეთ ოსეთზე პრეტენზიას, რომელიც 1921 წელს, საბჭოთა სოციალისტური რესპუბლიკის დროს. ჩვენი ხალხის ნების გარეშე გადაეცა. მაგრამ დღეს, ჩვენ ვხედავთ, რომ პატარა ქვეყანას რეგიონში არსებული რყევების პირობებში გადარჩენა მხოლოდ ძლიერი მოკავშირის შემთხვევაში შეუძლია. ინტეგრაციის შესახებ ე.წ. შეთანხმების გაფორმებამ გაქრობის ზღვარზე მყოფ სამხრეთ ოსეთს ახალი ძალა და სტიმული მისცა“- განაცხადა თიბილოვმა.