„თავისუფალი დემოკრატები“ სპეციალურ განცხადებას ავრცელებენ

პოლიტიკა - 15:27, 15 Mar, 2016

3012

თბილისის სახელმწიფო უნივერსიტეტში მიმდინარე მოვლენებს ეხმაურებიან ,,თავისუფალი დემოკრატები“. ალასანიას გუნდი მიიჩნევს, რომ სიტუაციის განმუხტვაში გადამწყვეტი როლი პროფესორ-მასწავლებლებსა და სტუდენტებს ენიჭებათ. ,,თავისუფალი დემოკრატები“ მიიჩნევენ, რომ უნივერსიტეტი უნდა გათავისუფლდეს პოლიტიკური ზეგავლენებისგან. განცხადებას ,,ნიუპოსტი“ უცვლელად გთავაზობთ.

,,ბოლო რამდენიმე დღეა, თბილისის სახელმწიფო უნივერსიტეტში ვითარება უკიდურესად იძაბება. რამდენჯერმე საქმე სტუდენტთა კონფლიქტამდე მივიდა. მშვიდობიანი პროტესტი და გამოხატვის თავისუფლება სტუდენტების უფლებაა, თუმცა დაუშვებელია, უნივერსიტეტი სხვადასხვა ჯგუფის ხისტი დაპირისპირების ასპარეზად იქცეს.

სიტუაციის განმუხტვაში გადამწყვეტი როლი პროფესორ-მასწავლებლებს და თავად სტუდენტებს ენიჭებათ. ვიმედოვნებთ, რომ ივანე ჯავახიშვილის სახელობის სახელმწიფო უნივერსიტეტის სტუდენტები და პროფესორ-მასწავლებლები მოძებნიან რესურსს კონფლიქტის ცივილიზებული, მოლაპარაკების გზით გადასაჭრელად და უახლოეს მომავალში პროცესები დისკუსიის რეჟიმში წარიმართება.

ჩვენი ქვეყნის ისტორიაში უნივერსიტეტს ყოველთვის ეჭირა განსაკუთრებული ადგილი. ჩვენ გვჯერა, მომავალი თაობისა და მივესალმებით, მათ ბრძოლას, რომელიც უნივერსიტეტის გაჯანსაღებისკენ უნდა იყოს მიმართული.

ჩვენ, „თავისუფალი დემოკრატები“აქტიურად ვაკვირდებით უნივერსიტეტში მიმდინარე მოვლენებს, თუმცა შეგნებულად არ ვერევით მასში, რადგან დაუშვებლად მიგვაჩნია პროცესის პოლიტიზება; მოვუწოდებთ სხვა პოლიტიკურ პარტიებსაც, თავი შეიკავონ უნივერსიტეტის შიდა საქმეებში ჩარევისაგან.

უნივერსიტეტი უნდა გათავისუფლდეს პოლიტიკური ზეგავლენებისგან.

აქვე გვინდა, უნივერსიტეტის უსაფრთხოების სამსახურს და სამართალდამცველებს მოვუწოდოთ, მაქსიმალური სიფრთხილით დაიცვან სტუდენტები და პროფესორ-მასწავლებლები ყოველგვარი პროვოკაციებისგან“ - ნათქვამია ,,თავისუფალი დემოკრატები“ განცხადებაში.