,,დავაყენებ ყველა პირის პასუხისმგებლობის საკითხს, ვინც მაესტროს ქონებას უკანონოდ გამოიყენებს“

,,დავაყენებ ყველა პირის პასუხისმგებლობის საკითხს, ვინც მაესტროს ქონებას უკანონოდ გამოიყენებს“ - ლევან გაჩეჩილაძე განცხადებას ავრცელებს

პოლიტიკა - 21:39, 13 Mar, 2016

1906

ტელეკომპანია მაესტროს დირექტორი, ლევან გაჩეჩილაძემ დღეს საღამოს საგანგებო განცხადება გაავრცელა, სადაც გაჩეჩილაძე კოტე გოგელიას მხრიდან მაესტროს მიზანმიმართულ გაკოტრებაზე საუბრობს და აცხადებს, რომ დააყენებს ყველა იმ პირის პასუხისმბგებლობის საკითხს ვინც მაესტროს ქონებას უკანონოდ გამოიყენებენ და ტელეკომპანიის საქმიანობას შეაფერხებს უკანონო ქმედებებით.

"არაერთხელ განვაცხადეთ, რომ კოტე გოგელიას მიერ მაესტროს მიმართ დაწყებული გაკოტრების პროცესი არის მიზანმიმართული და ხელოვნური, მას აქვს მხოლოდ ერთი მიზანი – მაესტროს სახელის და ქონების ხელში ჩაგდება.

ახლა ეს განსაკუთრებით აშკარა გახდა, რადგან საჯაროდ გაცხადდა მაესტროს მიერ იჯარით აღებულ შენობაში მისი დირექტორის არშეშვება კოტე გოგელიას და მისი დაქირავებული პირების მიერ, ასევე სხვა ხელოვნური დაბრკოლებების შექმნა დირექტორის უფლებამოსილების განხორციელებაში. საჯაროდ გაცხადდა კოტე გოგელიას და ილია კიკაბიძის განზრახვა მაესტროს აპარატურის დირექტორის თანხმობის გარეშე გამოყენებისა და მაესტროს სახელით ალტერნატიული მაუწყებლობის დაწყების შესახებ. დღეს ჩემთვის ცნობილი გახდა, რომ მათ მაესტროს ჟურნალისტების გადაყვანა უნდათ იმ კომპანიაში, რომელსაც დღეს უკანონოდ მიტაცებული აქვს მაესტროს ბრენდი.

საჯაროდ ვაცხადებ, რომ დავაყენებ ყველა პირის პასუხისმგებლობის საკითხს, ვინც მაესტროს ქონებას უკანონოდ გამოიყენებს, შეაფერხებს მაესტროს საქმიანობას მისი დირექტორის მიმართ უკანონო მოქმედებებით. გარდა ამისა, მოვითხოვ ზიანის ანაზღაურებას იმ პირებისგან, ვინც მაესტროს თანამშრომლებს აიძულებს, რომ ხელი მოაწერონ ხელშეკრულებებს სხვა კომპანიასთან.

მოვუწოდებ მაესტროს თანამშრომლებს, ნუ შეჰყვებიან ბინძურ თამაშებში მაესტროს დანგრევის და მისი ქონების მიტაცების მსურველებს და ნუ ითანამშრომლებენ კომპანიასთან, რომელთანაც მაესტროს ამჟამად სამართლებრივი დავა აქვს.

ასევე, მოვუწოდებ სახელმწიფო ორგანოებს და სასამართლოს, ნუ მოექცევიან აგორებული ცილისმწამებლური კამპანიის გავლენის ქვეშ და არ დაუშვან მაესტროს საკუთრების უკანონო ხელყოფა და მისი, როგორც დამოუკიდებელი ტელევიზიისთვის, შეფერხებების შექმნა," - ნათქვამია ლევან გაჩეჩილაძის განცხადებაში.