ხმაური უნივერსიტეტში - ,,ასისტენტი იქნება თუ სრული პროფესორი, ასეთ განცხადებაზე ადეკვატური ზომები იქნება მიღებული“

პოლიტიკა - 20:16, 13 Mar, 2016

2385

თსუ-ში შეკრებილი სტუდენტების პროტესტი გამოიწვია იურიდიული ფაკულტეტის პროფესორ-ასისტენტის გიორგი რუსიშვილის სოციალურ ქსელში გავრცელებულმა განცხადებამ. სტუდენტებმა განმარტება იურიდიული ფაკულტეტის დეკანისგან, გიორგი ბურდულისგან მოითხოვეს.

გიორგი ბურდულმა შეკრებილ სტუდენტებს განუცხადა, რომ ყველას აქვს უფლება საკუთარი აზრი გამოხატოს. მის ამ განცხადებას სტუდენტების მხრიდან პროტესტი მოჰყვა. ბურდულის განცხადება მიუღებელია თსუ-ს რექტორისთვისაც. ლადო პაპავა აცხადებს, რომ თუკი ასეთ ფაქტს ჰქონდა ადგილი, ადეკვატური ზომები იქნება მიღებული.

„ვინც არ უნდა იყოს, ასისტენტი იქნება თუ სრული პროფესორი, არავის მხრიდან არ შეიძლება ისეთი დამოკიდებულება, რომელიც სტუდენტის ღირსებას შეურაცხყოფს. ჩემი პრინციპული პოზიციაა, რომ ჩვენ გვაქვს წესდება, ამის ჩარჩოდან არ გამოვალთ, ეს ფაქტი ოფიციალურად შემოვიდეს და მივცემთ შიდა გამოძიებისთვის" - მიმართა სტუდენტებს ლადო პაპავამ.

ცნობისათვის, რუსიაშვილმა ფეისბუქის პირად გვერდზე სტუდენტებს მიმართა:

იურიდიული ფაკულტეტის სტუდენტების საყურადღებოდ, ვისაც ჩემი საგანი გაქვთ არჩეული და მიგაჩნიათ, რომ დეკანი სამარცხვინოა, თამამად შეგიძლიათ თავი აღარ შეიწუხოთ ლექციებზე დასწრებით და საგამოცდო ნაწერზე მიუთითოთ "სამამარცხვინო დეკანი" ან უბრალოდ ს. დ. გარანტირებულად გექნებათ 100 ქულა, რათა ხელი აღარ შეგეშალოთ სხვა არასამარცხვინო იურიდიულ ფაკულტეტზე გადასვლაში.