,,საგანმანათლებლო სისტემას აგენტი მართავს! ОДР-ს პარპაში უნდა დაემხოს!“ - პედაგოგთა საკოორდინაციო ცენტრი აქციას გეგმავს

პოლიტიკა - 13:20, 12 Mar, 2016

2519

უნივერსიტეტში მიმდინარე პროცესებს ეხმაურება პედაგოგთა საკოორდინაციო ცენტრის ხელმძღვანელი. როგორც ფერაძემ ,,ნიუპოსტს“ განუცხადა, სპეციალისტების დეფიციტი განათლების სისტემაში სწორედ აგენტურის მიზანმიმართული მუშაობის შედეგია. ფერაძე სისტემის წინააღმდეგ კანცელარიასთან აქციას აანონსებს.

,,მინდა მოვუწოდო მასწავლებლებს, მშობლებს, მთელ საგანმანათლებლო საზოგადოებას, შეუერთდით სტუდენტთა პროტესტს! მოცემულ ეტაპზე ძალიან მნიშვნელოვანია ე.წ. „ОДР“-ების ანუ „ინსტალირებული აგენტების“ წინააღმდეგ ბრძოლის უფრო ფართო ფრონტზე გადატანა, მით უფრო, რომ დღეს მთელ საგანმანათლებლო სისტემას სწორედ ასეთი აგენტი მართავს. ჩვენ არაერთხელ ავტეხეთ განგაში ამ თემაზე, მაგრამ უშედეგოდ: საგანმანათლებლო რესურსცენტრებისა და სკოლების სრული „ОДР“-ზაციის პროცესი, რომელიც წინა ხელისუფლების დროს დაიწყო, წარმატებით განაგრძო განათლების სისტემის მთავარმა „ОДР“-მა ალექსანდრე ონოფრიშვილმა, ახლა კი დღის წესრიგში სახელმწიფო უნივერსიტეტი დადგა. საგულისხმოა, რომ ასეთ ფონზე პოლიტიკური კონიუნქტურის მსხვერპლი გახდნენ ე.წ. „ჩაჭრილი“ მასწავლებლები, რაც, სპეციალისტების დეფიციტთან ერთად აგენტურული ქსელის მიზანმიმართული მუშაობის შედეგია. პედაგოგები, მშობლები, მეცნიერები უფრო დიდი საშიშროების წინაშე ვდგავართ. სანიკიძე-ონოფრიშვილის დანაშაულებრივი შეთქმულება უკვე მესამე პრემიერს „უძლებს„ და წალეკვას გვიპირებს. საფრთხეშია მოსწავლე-ახალგაზრდობა, მომავალი! ჩნდება განცდა, რომ ამჟამინდელი პრემიერიც კი ან სიტუაციის მსხვერპლია ან ვერ ძლევს ამ აგენტურის თარეშს. ამიტომ ჩვენ ერთად უნდა დავირაზმოთ! მოვუწოდებ ყველას და უპირველესად მასწავლებლებს, ორშაბათიდან დავიწყოთ საპროტესტო მოძრაობა მთავრობის კანცელარიასთან. განათლებისა და მეცნიერების სამინისტროს ხელმძღვანელობა სრულად უნდა გადავაყენოთ! „ОДР“-ს პარპაში უნდა დაემხოს!“ - აცხადებს დავით ფერაძე.