„ერთიანი ნაციონალური მოძრაობა“ პირადი ცხოვრების ამსახველი ფარული ვიდეოკადრების გავრცელებასთან დაკავშრებით განცხადებას ავრცელებს:

„საქართველოში უნდა დასრულდეს ბინძური მეთოდებით წარმოებული პოლიტიკური ბრძოლა. ბიძინა ივანიშვილისა და „ქართული ოცნების“ მმართველობის პირობებში პირადი ცხოვრების ამსახველი ჩანაწერების ფაბრიკაცია-გავრცელება ოპონენტების წინააღმდეგ ბრძოლის მთავარ იარაღად იქცა. ამას ხელს უწყობს ის, რომ მიუხედავად უკვე დაფიქსირებული ათეულობით შემთხვევისა ხელისუფლების მიერ არ ჩატარებულა გამოძიება და არ დასჯილან დამნაშავეები.

დამნაშავე დაუსჯელი დარჩა იმ შემთხვევაშიც კი, სადაც მისი ავტორი აშკარად ინდენტიფიცირებული იყო. ყველაზე ნათელი მაგალითია შინაგან საქმეთა მინისტრის ყოფილი მოადგილე ხვედელიძის მიერ ჩადენილი დანაშაული.

აღსანიშნავია ისიც, რომ ყველა შემთხვევაში ჩანაწერების ტირაჟირებას ხელს უწყობდნენ მთავრობასთან ღიად აფილირებული მედია საშუალებები.

„ნაციონალური მოძრაობა“ აცხადებს, რომ ეს სიბინძურე უნდა დამთავრდეს და დასრულდება კიდეც 2016 წლის ოქტომბერში ბიძინა ივანიშვილისა და „ქართული ოცნების“ არჩევნებში დამარცხების შემდეგ, ძალოვანი სტრუქტურების რეალური რეფორმით, მათ შორის სუს-ის გაუქმებით და დაუსჯელობის აღმოფხვრით“, - ნათქვამია განცხადებაში.