,,ნიუპოსტის“ სპეციალური განცხადება

პოლიტიკა - 16:21, 11 Mar, 2016

11787

ცოტა ხნის წინ სოციალურ ქსელში გავრცელდა ერთ-ერთი პოლიტიკოსის პირადი ცხოვრების ამსახველი ფარული ვიდეო. ,,ნიუპოსტისთვის“ კატეგორიულად მიუღებელია მსგავსი მეთოდების გამოყენება ქვეყნის ნებისმიერი მოქალაქის წინააღმდეგ, განურჩევლად მისი სოციალური მდგომარეობისა, ამგვარი კადრების გავრცელება არა მხოლოდ უზნეობის გამოხატულებაა, არამედ სისხლის სამართლის დანაშაული, რომელიც დარტყმის ქვეშ აყენებს თითოეულ მოქალაქეს და ქართულ სახელმწიფოს. შესაბამისად, ,,ნიუპოსტი" უარს აცხადებს მსგავსი ვიდეო-კადრების გავრცელებაზე და მოუწოდებს ყველა მედიასაშუალებას, ვისთვისაც ზნეობრივი ნორმების დაცვა უპირველესი ღირებულებაა, არ გაასაჯაროონ აღნიშნული ვიდეომასალა, როგორც პირდაპირი, ასევე ირიბი მეთოდებით.მიგვაჩნია, რომ მსგავს სიტუაციაში ყველაზე დიდი წილი პასუხისმგებლობისა სამართალდამცავ უწყებებზე მოდის.

სწორედ მათ აკისრიათ ვალდებულება, დაიცვან საქართველოს თითოეული მოქალაქე და მთელი საზოგადოების სტაბილურობა. გამომდინარე აქედან, ,,ნიუპოსტი“ მიმართავს ქვეყნის ხელისუფლებას და შესაბამის ორგანოებს, მოახდინონ ოპერატიული რეაგირება, რათა ამ ქმედების ჩამდენი ადამიანები, რა სტატუსის მატარებელიც არ უნდა იყვნენ ისინი, როულად და უმკაცრესად იქნენ დასჯილი. ხელისუფლების მხრიდან გადადგმული მხოლოდ ან ნაბიჯით შევძლებთ მომავალში მსგავსი უზნეო დანაშაულებებისგან თავის არიდებას.