მოქალაქეები პრობლემური სესხებისგან უნდა გათავისუფლდნენ - ,,თვისუფალი დემოკრატების“ ახალი კანონპროექტი

პოლიტიკა - 13:25, 11 Mar, 2016

2536

ფრაქცია „თავისუფალმა დემოკრატებმა“ და კანონპროექტის ავტორმა დავით ონოფრიშვილმა დაარეგისტრირა “საქართველოს საგადასახადო კოდექსში” ცვლილებების შეტანის შესახებ კანონის პროექტი.

ამ კანონპროქტის ამოქმედებით ათასობით ჩვენს მოქალექეს ექნება შესაძლებლობა განთავისუფლდეს უიმედო სესხისა და სანქციის დაფარვის ვალდებულებისაგან (ფინანსური ინსტიტუტების მიერ შემუშავებული შიდა კრიტერიუმების დაკმაყოფილების შემთხვევაში).

მეორეს მხრივ, ფინანსურ ინსტიტუტს შესაძლებლობა მიეცემა, რომ მის მიერ ნაპატიები სასესხო ვალდებულების ღირებულება ერთობლივი შემოსავლიდან გამოიქვითოს.

ეს შესაძლებელი გახდება შესაბამისი საგადასახადო შეღავათების დაწესების მეშვეობით. ფინანსური ინსტიტუტების მიერ, ფიზიკური პირებისთვის სასესხო ვალდებულების პატიების შედეგად მიღებული სარგებელი საშემოსავლო გადასახადისგან გათავისუფლდება (მოქმედი კანონმდებლობით, აღნიშნული თანხა ფიზიკური პირისთვის შემოსავალს წარმოადგენს, რაც გადასახადით დაბეგვრას ექვემდებარება).

არსებული მდგომარეობით ფინანსური ინსტიტუტების მიერ, ამგვარი სესხების ერთობლივი შემოსავლიდან გამოქვითვას ან უიმედო ვალად აღიარებას გარკვეული პროცედურები და ხარჯები სჭირდება, ხოლო პატიების შემთხვევაში, ნაპატიები სესხი კანონმდებლობის თანახმად, დაბეგვრას ექვემდებარება. ჩვენი ინიციატივით ბანკები ამ გადასახადისგან გათავისუფლდებიან, რაც უიმედო ვალების აღიარების სტიმულირებას მოახდენს.

ამ კანონპროექტით, სახელმწიფოს მხრიდან სტიმულირება ხდება და კომერციულ ბანკებს უფლება ენიჭებათ საკუთარი, შიდა კრიტერიუმების მიხედვით, ფიზიკურ პირებს ვადაგადაცილებული და პრობლემური სესხები ჩამოაწერონ.