„ნანუკას შოუს“ მორიგ გადაცემას დიდი გამოხმაურება მოყვა. გადაცემის თემა იყო სექსი. როგორც აღმოჩნდა ეს სიტყვა ყველას სხვადასხვანაირად ესმის და აზრთა სხვადასხვაობაც სწორედ ამან გამოიწვია. განსაკუთრებული გამოხმაურება მოჰყვა ერთ-ერთი სტუმრის კითხვაზე პასუხს, რომელსაც ნანუკამ უპასუხა. თუ რას ეტყოდა შვილს, თუ დაინახავდა, რომ ქუჩაში ორი მამაკაცი ერთმანეთს ჰკოცნის...

„აფეთქდა ფეისბუკი… ეს კარგია. არადა ხალხის ერთ ნაწილს რომ ჰკითხო, ვიღას უკვირს დღეს სექსის თემაო?! გადახედეთ კომენტარებს და მიხვდებით რომ ამ ქვეყანაში ბავშვების უმრავლესობა ჯერ კიდევ წეროებს მოჰყავთ.

ყველაზე დიდი აღფშოთება მოჰყვა ჩემს პასუხს კითხვაზე, რას ვუპასუხებდი შვილს, რომელიც კაცისა და კაცის "კოცნაობას" , "ზასაობას" (რაც გინდათ ის დაარქვით) დაინახავდა.

არ ვუპასუხებ, რომ სიყვარული მარტო ქალს და კაცს შორის არსებობს. იმიტომ რომ ეს ტყუილია. მოსწონს ეს ვიღაცას თუ არ მოსწონს.... მნიშვნელობა არ აქვს. ეს არის ტყუილი, რომელშიც შვილი "გამომიჭერს" გაიზრდება თუ არა.

არის თუ არა ნორმა? მაგარი უცნაური სიტყვაა. ვისთვის ვინ და ვისთვის რა არის ნორმალური.

წყვილებზე გადაცემას ვაკეთებდი და ერთი გაგვახსენდა. ცოლი ჰყავს 22 წლით უმცროსი... ტრადიციული ქართული ოჯახი აქვთ, შვილები, ვახშამი მაგიდასთან, სიდედრზე ანეგდოტები, ცოლი "კუხნაში" (ფანტასტიურად ამზადებს).... არის თუ არა ნორმა?! როცა შვილზე პატარა ცოლი გყავს? ვიღაცისთვის არა. ვიღაცისთვის -კი.

მე კიდევ მგონია, რომ ნორმაა ყველაფერი სადაც სიყვარულია. იმიტომ რომ ღმერთია ჩემთვის სიყვარული.

და მნიშვნელობა არ აქვს ვინ გიყვარს. ქალი თუ კაცი, ქრისტიანი თუ მუსულმანი, რუსი თუ ამერიკელი, დედა თუ დედინაცვალი. როცა გიყვარს ადამიანი ღმერთის მეგობარი ხარ. ღმერთმა კიდევ მაგარი მეგობრობა იცის. როცა ხედავს, რომ გჩაგრავენ მაგრად გიცავს. იქ არის სადაც შენ ხარ და არა ისინი ვინც გჩაგრავენ.

მის გარეშე ამ ქვეყანაზე არც არაფერი ხდება . ამიტომაც არის რომ იცინის, როცა ჩვენ აქ რაღაცაზე ვბჭობთ...

წარმატებულ დღეს გისურვებთ ყველას“-წერს ნანუკა ფეისბუკის პირად გვერდზე.