დაურეგისტირებელი მიწის მოსახლეობისთვის უფასოდ გაფორმება - ენმ ინიციატივას პარლამენტი განიხილავს

პოლიტიკა - 12:17, 10 Mar, 2016

11118

საქართველოს პარლამენტის ადამიანის უფლებათა დაცვის და სამოქალაქო ინტეგრაციის კომიტეტი დღეს გიგი წერეთლის და გიორგი ღვინიაშვილის ინიციატივას განიხილავს, რომელიც „საჯარო რეესტრის შესახებ“ საქართველოს კანონში ცვლილების შეტანას ითვალისწინებს. ცვლილებების მიხედვით მოსახლეობას ხელსუფლების მიერ დაურეგისტირებელი მიწის უფასოდ გაფორმება შეეძლება.

ენმ-ს წევრების თქმით მოქალაქეთა უმეტესობას არ გააჩნია საჯარო რეესტრში წარსადგენი უძრავ ქონებაზე საკუთრების უფლების დამდგენი იურიდიული დოკუმენტი. მაგალითად, მამაპაპისეულ მიწაზე არ გააჩნიათ არანაირი საკუთრების დამდგენი იურიდიული დოკუმენტი, თუმცა ისინი ფაქტიურად ფლობენ და განკარგავენ უძრავ ნივთს. ასევე ხშირია შემთხვევები ზეპირი წესით ნასყიდობებთან დაკავშირებით.

კანონპროექტის მიზანია, მოქალაქეთათვის მათ მართლზომიერ მფლობელობაში არსებული უძრავი ნივთის სამართლებრივი მდგომარეობის მოწესრიგება, საჯარო რეესტრის მიერ აღნიშნული უძრავი ნივთის უსასყიდლოდ საკუთრებაში რეგისტრაცია.

"მიწის ნაკვეთი, რომელზეც არსებობს მართლზომიერი საოჯახო საბუთები და ა.შ. მაგრამ არ არის რეგისტრირებული საჯარო რეესტრში, შესაძლოა გახდეს სახელმწიფოს საკუთრება. ჩვენი კანონი მარტივია, ის ითვალისწინებს, რომ სახელმწიფომ მოაგვაროს ეს საკითხი მოქალაქისთვის მარტივად უფასოდ, გააკეთოს რეგისტრაცია და გადასცეს მას საკუთრებაში," - განაცხადა გიგი წერეთელმა ინიციატივასთან დაკავშირებით.