სოხუმში დე ფაქტო შს მინისტრის მოადგილე ცემეს - აქციები ოკუპირებულ აქფხაზეთში

პოლიტიკა - 11:29, 10 Mar, 2016

2461

ოკუპირებულ აფხაზეთში გუშინ გამართულ საპროტესტო აქციზე ე.წ შინაგან საქმეთა მინისტრის მოადგილე სცემეს. აქციაზე დე ფაქტო მინისტრის ლეონიდ ძიაპშბას გადადგომას ითხოვდნენ. მომიტინგეებთან შეხვედრა შს მინისტრმა და მისმა მოადგილემ გადაწყვიტეს, თუმცა აქციაზე დაპირსპირება მოხდა, შს მინისტრმა სამინისტროს შენობაში შესვლა მოასწრო, მის მოადგილეს კი აქციის მონაწილეები ფიზიკურად დაუპირისპირდნენ და სახის არეში რამდენიმე დარტყმა მიაყენეს.

საპროტესტო აქციის გამართვის მიზეზი დრანდის ციხის ყოფილი უფროსის რუსლან ჯელიას ავტომობილის დაცხრილვა გახდა. გავრცელებული ინფომაციით აფხაზეთის საგზაო პოლიციის თანამშრომლებმა 7 მარტს ჯელიას ავტომობილის გაჩერება მოსთხოვეს, მოთხოვნის დაუმორჩილებლობის შემდეგ კი მისი მისამართით გამაფრთხილებელი გასროლა განახორციელეს. მომიტინგეები ამ ინციდენტზე პასუხისმგებლობას დე ფაქტო შს სამინისტროს აკისრებდნენ, მათი თქმით ჯელიას მოძრობის წესები არ დაურღვევია და პოლიციელებმა მისი მისამართით პროვოკაციული ქმედებები ჩაიდინეს.

დაუდასტურებელი ინფორმაციით, პირებს რომლებმაც ჯელია ავტომობილს ცეცხლი გაუხსნეს, შს მინისტრისგან მისი დაკავება ქონდათ ნაბრძანები. თუმცა უცნობია უკავშირდება თუ არა ეს ფაქტი უწყებრივ გამოძიებას, რომელიც დრანდის ციხიდან საქართველოს მოქალაქის ბაჩუკი ლატარიას გაქცევასთან დაკავშირებით მიმდინარეობს. ლატარია ციხიდან 2015 წლის ნოემბრის თვეში გაიქცა, ამ ფაქტთან დაკავშირებით დრანდის ციხეში შიდაუწყებრივი მოკვლევა დაიწყო, ჯელია კი თანამდებობიდან დეკემბრის თვეში გაათავისუფლეს.