როგორც ცნობილი გახდა, ალექსი პეტრიაშვილის თავდასხმის საქმეზე დაკავებული ლევან მექვაბიშვილი იუნა შაფათავას ყოფილი მეუღლეა, რომელსაც 2008 წლის 30 ნოემბერს დაშორდა. იუნა გუშინ მთელი დღის განმავლობაში პასუხობდა ჟურნალისტების სატელეფონო ზარებს, თუმცა დღეს იგივეს აღარ აპირებს, რადგან როგორც სოციალურ ქსელში წერს, მან უკვე ყველას ყველაფერი უთხრა. მართალია ავტობიოგრაფიულ წიგნში იუნას ყოფილი მეუღლესთან თანაცხოვრების პერიოდის არაერთი აგრესიული და მძაფრი შინაარსის ეპიზოდი აქვს შეტანილი, თუმცა ის მაინც ამტკიცებს რომ პირადი პირადია და იმ დროინედ, ლევანის მიერ გამოხატულ აგრესიულ თუ ფიზიკურ შეურაწყოფებს, არანაირი კავშირი არ აქვს პეტრიაშვილის დაჭრასთან. მიუხედავად ყველაფრისა, საფათავა ყოფილ მეუღლეს მხოლოდ დადებითად ახასიათებს.

„გუშინ მთელი დღე ტელეფონი არ გაჩერებულა, ყველა არხთან ერთი და იგივე კომენტარი გავაკეთე. დღეს დილიდან იგივე ხდება, თუმცა მე არ გიპასუხებთ, უკვე ვთქვი, რისი თქმაც საჭიროდ ჩავთვალე. თქვენ ერთობით და თან, რაღაც აბსურდული თეორიების მოძიებით, გამოძიებას უშლით! მე არ ვჭირდები გამოძიებას, მე თქვენ აბსურდს და რეიტინგს ვჭირდები, დებილი "სექს ვამპირის" და "კრიმინალის" ტაბლოიდური ისტორიისთვის. არც მე ვარ ვირჯინია ჰილლი, არც ჩემი ყოფილი ქმარია ბაგსი სიგალი. არ ვაპირებ ამ თემით სპეკულირებას და არც თქვენ გირჩევთ. დამანებეთ თავი“- წერს იუნა შაფათავა ფეისბუკის პირად გვერდზე.