,,რესპუბლიკური პარტია ამ პროცესს პოლიტიკურად გაემიჯნა“

,,რესპუბლიკური პარტია ამ პროცესს პოლიტიკურად გაემიჯნა“ - უსუფაშვილი ქორწინების საკითხზე

პოლიტიკა - 14:54, 08 Mar, 2016

2907

"რესპუბლიკური პარტია ინიცირების პროცესს პოლიტიკურად გაემიჯნა - ეს განცხადება დავით უსუფაშვილმა ქორწინების, როგორც ქალისა და მამაკაცის ერთობის, კონსტიტუციით განსაზღვრის თაობაზე მმართველი გუნდის მიერ ინიცირებულ კანონპროექტზე კომენტირებისას გააკეთა.

"ცალსახად ითქვა, რომ პოლიტსაბჭოს გუშინდელ სხდომაზე არანაირი თემა არ განხილულა, ქორწინების საკითხზე საკონსტიტუციო ცვლილების საკითხის გარდა. პოლიტსაბჭოს ამ სხდომაზე "რესპუბლიკური პარტიის" წარმომადგენლობა არ იყო - მე გახლდით როგორც პარლამენტის თავმჯდომარე. ცხადია, "რესპუბლიკელიც" ვარ, მაგრამ "რესპუბლიკურმა პარტიამ" პოლიტსაბჭომდე განცხადება გააკეთა, რომლითაც მან ძალიან მკაფიოდ აღნიშნა, რომ "რესპუბლიკური პარტია" საქართველოში მოქმედი კანონმდებლობით, ქორწინებას აღიარებს როგორც ქალისა და მამაკაცის ნებაყოფლობით ერთობას და არაფერს სხვას. შესაბამისად, ჩვენი კანონმდებლობა და კონსტიტუცია ამ თვალსაზრისით ნაკლული სამართლებრივად არ არის. თუკი ვინმე თვლის, რომ რაიმე მეტად და უკეთესად შეიძლება ჩაიწეროს შიგნით, ამას სწორი დრო და სწორი ტაქტიკა სჭირდება. იმ ვითარებაში, როდესაც ცვლილების ინიცირება ხდება, ამით იმის გაცხადება ხდება, რომ ამ თვალსაზრისით შესაძლოა კონსტიტუციას რაღაც აკლია, ხოლო თუ ინიცირებას სწრაფი გადაწყვეტილება არ და ვერ მოჰყვება, მაშინ ჩვენ ვტოვებთ პრობლემას კიდევ უფრო გამრავლებულს და პრობლემა კიდევ უფრო მძაფრდება“ - აცხადებს პარლამენტის თავმჯდომარე.

დავით უსუფაშვილი მიიჩნევს, რომ ან თემით დომინირება არ შედის ქართველი ხალხის ინტერესბში და ეს მმართველი გუნდის პოლიტიკური შეცდომაა. პარლამენტის თავმჯდომარემ აღნიშნა, რომ ის პატივს სცემს კოალიციის იმ წევრებს, რომლებიც საკითხს მორალურ ჭრილში განიხილავენ და არა პოლიტიკურ ჩარჩოში.

,,ჩვენ ვთვლით, რომ ეს არის გარკვეულ პოლიტიკურ დანაღმულ ველზე შესვლა. ამ თემით უახლოესი თვეების და საარჩევნო პროცესის დომინირება, არანაირად არ შედის საქართველოს, ქართველი ხალხის ინტერესებში. ჩვენ ბევრი მნიშვნელოვანი თემა გვაქვს, რომლის საფუძველზეც და რომლის ფონზეც უნდა მოხდეს საარჩევნო გადაწყვეტილებების მიღება და არა საეჭვო წარმოშობისა და საეჭვო მიზნების თემით. მესმის იმ ადამიანების, ვისაც ეს თემა გულწრფელად აწუხებს, მაგრამ საკითხის მოგვარების პოლიტიკური მხარე უფრო პოლიტიკურად დანაღმულ ველზე შებიჯებას, პოლიტიკური მახისკენ ნაბიჯს ემსგავსება. ამიტომ ამას პოლიტიკურ შეცდომად ვთვლით და "რესპუბლიკური პარტია ინიცირების პროცესს პოლიტიკურად გაემიჯნა. ჩვენ პოლიტიკოსები ვალდებული ვართ, ყველა საკითხი განვიხილოთ პოლიტიკურ ჩარჩოშიც და აქ არის განსხვავებაც", - განუცხადა ჟურნალისტებს დავით უსუფაშვილმა.