"ქართული ოცნების" პოლიტსაბჭომ ქორწინების სუბიექტების დაზუსტების ინიციატივას მხარი დაუჭირა

პოლიტიკა - 20:05, 07 Mar, 2016

1506

კოალიცია "ქართული ოცნების" პოლიტსაბჭო კონსტიტუციაში ქორწინების სუბიექტების დაზუსტების ინიციატივას მხარდაჭერას უცხადებს. ამასთან დაკავშირებით განცხადება საქართველოს პრემიერ-მინისტრმა პოლიტსაბჭოს დასრულების შემდეგ გააკეთა. გიორგი კვირიკაშვილის თქმით აღნიშნული ცვლილება ქორწინების, როგორც ქალისა და მამაკაცის სამოქალაქო კოდექსში არსებული განმარტების საკონსტიტუციო დონეზე გამყარებას გულისხმობს. ამასთანავე პრემიერის თქმით კოალიცია ერთგულია დისკრიმინაციის მიუღებლობის პრინციპის და გამოდის ინიციატივით, რომ ისეთი მნიშვნელოვანი ფასეულობის დაცვა, რაც არის ქორწინება, გარანტირებული იყოს ქვეყნის კონსტიტუციის დონეზე.

პრემიერის განცხადებით აღნიშნულ საკითხთან დაკავშირებით, რესპუბლიკური პარტიის მხრიდან საწინააღმდეგო პოზიცია, არა საკითხის შინაარსს, არამედ აღნიშნული ცვლილების განხორციელების გზებსა და საშუალებებს ეხებოდა.

"კოალიცია „ქართული ოცნების“ პოლიტსაბჭოს დღევანდელ სხდომაზე განხილულ საკითხთა შორის ერთ-ერთი უმთავრესია - ინიცირება საკონსტიტუციო ცვლილებისა, რომელიც ქორწინების, როგორც ქალისა და მამაკაცის ერთობის, სამოქალაქო კოდექსში არსებული განმარტების საკონსტიტუციო დონეზე გამყარებას გულისხმობს.
პოლიტსაბჭომ საკონსტიტუციო ცვლილების ინიცირების პროცესის დაწყებას მხარი დაუჭირა. „რესპუბლიკურმა პარტიამ“ დააფიქსირა განსხვავებული პოზიცია, რაც ეხება არა საკითხის შინაარსს, არამედ - მისი განხორციელების გზებსა და საშუალებებს.
ამასთანავე, საზოგადოებისთვის ცნობილია, რომ კოალიცია „ქართულმა ოცნებამ“ ცოტა ხნის წინ გააკეთა მნიშვნელოვანი განაცხადი, რომ დისკრიმინაციის ყველა ფორმის წინააღმდეგია, რაც გამყარდა კიდეც შესაბამისი კანონმდებლობის მიღებით.
ჩვენ, კიდევ ერთხელ, ხაზგასმით, ერთხმად ვადასტურებთ კოალიციის ერთგულებას ამ პრინციპისადმი და ამავდროულად გამოვდივართ ინიციატივით, რომ ისეთი მნიშვნელოვანი ფასეულობის დაცვა, როგორიცაა ქორწინება, გარანტირებული იყოს ქვეყნის მთავარი კანონის - კონსტიტუციის დონეზე“.- განაცხადა გიორგი კვირიკაშვილმა.