პირადი ცხოვრებით შანტაჟი ხელისუფლების სტილია - ეს საერთაშორისო სკანდალია

პირადი ცხოვრებით შანტაჟი ხელისუფლების სტილია - ეს საერთაშორისო სკანდალია - ვაშაძე

პოლიტიკა - 14:47, 07 Mar, 2016

2196

საპარლამენტო უმცირესობის ერთ-ერთი ლიდერი გიორგი ვაშაძე საკონსტიტუციო სასამართლოს თავმჯდომარის გიორგი პაპუაშვილის მიერ გაკეთებული განცხადების საფუძველზე გამოძიების დაწყებას ითხოვს, თუმცა იქვე აცხადებს, რომ "ჰაკიმ ფაშას" ვიდეოს გავრცელების მსგავსად, ამ საქმის გამოძიება ხელისუფლების ინტერესში არ შედის.

"ეს განცხადება არავის გაკვირვებია, რადგან ხელისუფლება ყოველთვის მიმართავს მსგავს ბინძურ მეთოდებს. "ქართული ოცნება" მაქსიმალურად ცდილობს წნეხის ქვეშ ჰყავდეს სასამართლო. თუ საკონსტიტუციო სასამართლოს თავმჯდომარის განცხადების მიუხედავად, "ჰაკიმ ფაშას" მსგავსად აიტვირთება ვიდეოები, ეს იქნება საერთაშორისო სკანდალი"- აღნიშნა გიორგი ვაშაძემ "ნიუპოსტთან" საუბრისას.

მისი თქმით, ხელისუფლებას არაფერი გაუკეთებია "ჰაკიმ ფაშას" სახელით გავრცელებული ვიდეოს გამოსაძიებლად. ენმ-ს წევრი დარწმუნებულია, რომ პაპუაშვილის განცხადების გამოძიებაც არ შედის დღევანდელი ხელისუფლების ინტერესში.

"სოციალურ ქსელებში სხვადასხვა ტიპის პირადი ცხოვრების ამსახველი კადრები ადრეც ვიხილეთ ინტერნეტში, თუმცა პასუხისმგებლობაში არავინ არის მიცემული, რადგან ხელისუფლებას არ სურს მათი გამოძიება. რადგან მათი სტილია პირადი ცხოვრებით შანტაჟი"- აღნიშნა დეპუტატმა.

მისი თქმით, "რუსთავი 2" -ის გენერალურ დირექტორსაც სწორედ ასეთი "ბინძური მეთოდებით დაემუქრნენ".

"როცა მიხვდნენ, რომ რუსთავი 2 -ს ვერ მიითვისებდნენ, გვარამიაზეც ზეწოლას ამ სცენარით შეეცადნენ"- თქვა დეპუტატმა "ნიუპოსტთან" საუბრისას.