3 მარტს ქალაქ ოზურგეთის მერიამ ღვაწლმოსილი ქალბატონები დააჯილდოვა

პოლიტიკა - 17:48, 04 Mar, 2016

1698

ქალაქ ოზურგეთის მუნიციპალიტეტის მერიამ დედის დღესთან დაკავშირებით სადღესასწაულო ღონისძიება გამართა, სადაც სხვადასხვა სფეროში მოღვაწე წარმატებული ქალბატონები ქალაქის მერიის მიერ დააჯილდოვდნენ.

საღამო დიზაინერ-დეკორატორის მარინა ტატარიანისა და მხატვარ თინათინ ჟღენტის შთამბეჭდავი ნამუშევრების ფონზე გაიხსნა.

საღამოს დასაწყისში საზოგადოებას ქალაქ ოზურგეთის მუნიციპალიტეტის მერმა ბეგლარ სიორიძემ მიმართა:

‘’ტრადიციისამებრ, ქალაქ ოზურგეთის მუნიციპალიტეტის მერია აგრძელებს ქალაქის წარმატებული და ღვაწლმოსილი ქალბატონების დაჯილდოებას.

აქ მყოფთ და ასევე, ყველა ქალბატონს ვულოცავ დღევანდელ დღეს. ბედნიერები, წარმატებულები და დღეგრძელები იყავით. თქვენი როლი და ღვაწლი ფასდაუდებელია. დაფასებულები იყავით, როგორც თქვენი ოჯახების, ასევე, ქვეყნის მიერ’’

ღონისძიებაზე, რომლის ორგანიზატორი ქალაქის მერიის კულტურის სამსახური და ა.ა.ი.პ. ‘’კულტურისა და მოსწავლე ახალგაზრდობის ცენტრი’’ იყო, სხვადასხვა შემოქმედებითი ნომერი შესრულდა.

ღონისძიებაში მონაწილეობა ა.ა.ი.პ. ‘’კულტურისა და მოსწავლე-ახალგაზრდობის ცენტრი’’-ს ანსამბლებმა ‘’გამა’’, ‘’ჰარმონია’’, ‘’ქალაქური’’, ინდივიდუალურმა შემსრულებლებმა და სამუსიკო სკოლის ტრიომ მიიღეს.

ქორეოგრაფიული ნომრები ამავე ა.ა.ი.პ.-ის ქორეოგრაფიული სტუდიის მოცეკვავეებმა წარმოადგინეს.