თუ არჩევნებზე გასვლა კოალიციურ ფორმატში მოხდება, გაერთიანება ძალიან მკაფიო მიზნების გარშემო მოხდება

პოლიტიკა - 10:04, 04 Mar, 2016

1876

გიორგი კვირიკაშვილი „რესპუბლიკურ პარტიასთან“ გუშინ გამართულ შეხვედრას გამოეხმაურა. მისი თქმით, კოალიციაში აზრთა გარკვეული სხვადასხვაობა ბუნებრივი პროცესია, თუმცა მთავრობა უნდა იყოს ერთიანი საკუთარ გადაწყვეტილებებში.

„ვფიქრობ, მთავრობამ უნდა მოახდინოს მაქსიმალური კონცენტრირება და ფოკუსირება იმ ამოცანებზე, რომელიც ჩვენს მოსახლეობას გააჩნია, რომელიც არის აქტუალური ჩვენი ქვეყნისთვის და ამ მიზნების მიღწევაში უნდა ვიყოთ ერთიანნი,“ – განმარტა პრემიერმა.

გიორგი კვირიკაშვილი კოალიციაში მიმდინარე მოვლენებს შეეხო. პრემიერი მიიჩნევს, რომ დაწყებული პოლიტიკური პროცესი არის ძალიან მნიშვნელოვანი და ამ პროცესში იქნება მოლაპარაკებები, როგორც ორმხრივ, ისე მრავალმხრივ ფორმატში.

„პარტნიორობა ქართულ ოცნებასა და რესპუბლიკურ პარტიას შორის არის მნიშვნელოვანი. გარკვეული შეთანხმებები წინასაარჩევნო პროცესში რა თქმა უნდა მისაღწევი იქნება. თუმცა კოალიცია არის მრავალპარტიული და თუ "ქართული ოცნება" წინასაარჩევნოდ მრავალპარტიულ ფორმატში იქნება, რა თქმა უნდა ნებისმიერი შეთანხმება, რომელიც ორმხრივ ფორმატში იქნება მიღწეული მრავალმმხრივ ფორმატშიც იქნება დასადასტურებელი. ერთი რამ უნდა ითქვას, რომ პარტია ქართული ოცნება მნიშვნელოვნად განახლდება და მოხდება ერთიანი მიზნების გარშემო კონსოლიდაცია. იმ შემთხვევაში, თუ კოალიციურ ფორმატში მოხდება არჩევნებზე გასვლა, გუნდი რომელიც შეიკრიბება, გაერთიანდება ძალიან მკაფიო მიზნების გარშემო. ეს მიზნები იქნება, უპირველეს ყოვლისა, დაფუძნებული ჩვენს მთავარ ფასეულობებსა და ტრადიციებზე და, რა თქმა უნდა იქნება, კონსენსუსი საქართველოს ევროპულ და ევროატლანტიკურ მომავალზე,“ – აღნიშნა პრემიერმა.