"მარიხუანის გამო ციხეში არ უნდა მიდიოდნენ"- მიროტაძე მოწინააღმდეგეებში ტექნიკური ხარვეზის გამო აღმოჩნდა

პოლიტიკა - 15:22, 03 Mar, 2016

1891

მარიხუანას მოხმარების დეკრიმინალიზაციის მოწინააღმდეგეებში მისი გვარის აღმოჩენას პარლამენტარი ანი მიროტაძე გაუგებრობას უწოდებს. როგორც უმრავლესობის წევრმა დეპუტატმა „ნიუპოსტს“ განუცხადა, ის ყოველთვის ემხრობოდა იმ პოზიციას, რომ მარიხუანას მოხმარების გამო ადამიანი ციხეში არ უნდა მიდიოდეს და ეს პოზიცია მას, როგორც კოლეგებთან, ასევე მედიასთან არაერთხელ აქვს გაცხადებული:

„ტექნიკური გაუგებრობის გამო მე ვარ მოწინააღმდეგეებში. მე მახსოვს რომ მხარი დავუჭირე. არ ვიცი ეს ტექნიკური გაუგებრობაა თუ რაღაც დამემართა, ჩემი პოზიცია ყველასთვის იყო გაცხადებული, ყველამ იცოდა, რომ მე ვარ იმის მომხრე, რომ მარიხუანას მოხმარების გამო ადამიანები ციხეში არ უნდა მიდიოდნენ . რა თქმა უნდა მარიხუანას მოხმარება კარგი არ არის და სახელმწიფომ პრევენციული ზომები უნდა განახორციელოს იმისთვის, რომ მომხმარებლებმა არათუ მოიმატოს, არამედ მოიკლოს, მაგრამ ამაში საპატიმრო ზომა არ უნდა იყოს გამოყენებული.“- განაცხადა მიროტაძემ.

დეპუტატის შეფასებით, საჭირო იყო რომ აღნიშნული კანონპროექტის ავტორებს კოლეგებთან უფრო მეტი კონსულტაცია გაემართათ და კონკრეტული პუნქტები უფრო დეტალურად განხილულიყო:

„წინა სხდომაზე, როდესაც ამ საკითხის განხილვა მოხდა და კენჭისყრა გადაიდო, მე კანონპროექტის ინიციატორებს ვთხოვე, რომ კონკრეტულ პუნქტებთან დაკავშირებით კოლეგებთან კონსულტაციები გაეგრძელებინათ, როგოც ვიცი ეს კონსულტაციები არ შემდგარა და კენჭისყრაზე მაინც დადგა საკითხი. მიუხედავად ამისა, არ ვიცი რა მოხდა, ჩემი ხმა მოწინააღმდეგეებში აბსოლუტურად ზედმეტად არის, იმიტომ რომ მიმაჩნდა და მიმაჩნია, რომ ამისთვის ადამიანი ციხეში არ უნდა მიდიოდეს.“- აღნიშნავს დეპუტატი.

როგორ მოხვდა ანი მიროტაძის ხმა მოწინააღმდეგეთა შორის, ამის გარკვევას დეპუტატი ხვალ საკანონმდებლო ორგანოში მისვლისას აპირებს.