განსხვავებით სხვებისგან, ისტერიკის გარეშე მივიღებთ გადაწყვეტილებას- ზურაბ ტყემალაძე

პოლიტიკა - 12:18, 03 Mar, 2016

1306

მრეწველების პარტიის ერთ-ერთი ლიდერი ზურაბ ტყემალაძე პრემიერის მიერ დრეს გავრცელებულ საგანგებო განცხადებას გამოეხმაურა. ტყემალაძე ეთანხმება გიორგი კვირიკაშვილს და აცხადებს რომ ჯარის პოლიტიკურ პროცესებში ჩართვა დაუშვებელია. მისი თქმით, თუ დაპირისპირებული პარტიების მიმართ რამე ღონისძიება გატარდება, ეს პროცესი ორივე პარტიას უნდა შეეხოს. ზურაბ ტყემალაძე პირობას დებს, რომ თუ კოალიციის ლიდერი გადაწყვეტს , რომ კოალიცია მრეწველებმა უნდა დატოვონ, ისინი ამას ისტერიკის გარეშე გააკეთებენ:

„მინდა დავეთანხო პრემიერს იმაში, რომ ვინ დაიწყო, როგორ დაიწყო თავისთავად ჩანს ამ განცხადებიდანაც, დავეთანხმო იმაში, რომ ჯარის პოლიტიზირება და ამ საკითხში ჩართვა ნამდვილად არ შეიძლება, ასევე არ შეიძლება თავდაცვის მინისტრისგან მსგავსი განცხადებების გაკეთება. რა გადაწყვეტილებაც არ უნდა მიიღოს კოალიციის ლიდერმა ჩვენ მას დავემორჩილებით, თუ იქნება მიღებული გადაწყვეტილება ალბათ ორივეს მიმართ უნდა იყოს და არა ერთის მიმართ. მინიშნებაც თუ იქნება იმის შესახებ, რომ ჩვენ კოალიციისთვის ზედმეტი ვართ, უხმოდ და ყოველგვარი ისტერიკის გარეშე მივიღებთ გადაწყვეტილებას, განსხვავებით ყველა იმ პარტიისგან ვინც ისტერიკას მართავს.“- განაცხადა ზურაბ ტყემალაძემ