"იარაღი პოლიტიკური შეხედულებების გამო ჩაუდეს"- ქუთაისში პატიმარი 14 დღეა შიმშილობს

პოლიტიკა - 13:46, 02 Mar, 2016

1765

ქუთაისის მეორე საპყრობილეში ორ კვირაზე მეტია პატიმარი გიზო ჭანია შიმშილობს. როგორც "ნიუპოსტს" პატიმრის ახლობლებმა განუცხადეს, ჭანია 4 თვის წინ დააკავეს, მას იარაღის უკანონო შენახვა ედება ბრალად, თუმცა პატიმარი ამბობს, რომ სამართალდამცავებმა ცეცხლსასროლი იარაღი ჩაუდეს.

მეტიც, ახლობლების თქმით ახალგაზრდას აღიარებით ჩვენებაზე მოტყუებით მოაწერინეს ხელი.

"გამომძიებელმა ცარიელ ფურცელზე მოაწერინეს ხელი, მოატყუეს ანალიზებზე თანხმობის ფურცელიაო, შემდეგ კი დოკუმენტი შეადგინეს, რომ მან აღიარა იარაღის ამოღება, რაც არ მომხდარა "- აცხადებს პატიმრის ახლობელი.

მისი თქმით, ჭანიები სოციალურად დაუცველთა კატეგორიას მიეკუთვნებიან, შესაბამისად ვერც მოსალოდნელი 1 500 ლარიანი ჯარიმის გადახდას ვერ შეძლებენ.

გარდა ამისა დაკავებულის ოჯახი აცხადებს, რომ მათი ახლობელი პოლიტიკური შეხედულებების გამო დააკავეს. ის "ნაციონალური მოძრაობის" აქციებს ხშირად ესწრებოდა და ენმ-ს მხარამჭერად ითვლება.

"მასთან საკანში სუს- ის მაშინდელი უფროსი გიორგი ხურცია შეუშვეს, პატრულის ამჟამინდელმა უფროსმა მეზობელ ჭანიას სთხოვა განცხადებები არ გაეკეთებინა და უახლოეს პერიოდში გირაოს სანაცვლოდ გაათავისუფლებდნენ "- გვიყვება პატიმრის ოჯახის წევრი.