ჯანდაცვის მინისტრი დავით სერგეენკო მიიჩნევს, რომ პროექტი „რა გაწუხებთ?“ საქართველოს მოსახლეობის სურვილებისა და მოლოდინების, მათი საჭიროებების ზუსტად განსაზღვრისთვის დაიწყო და საზოგადოებასთან კომუნიკაციის გაფართოებას შეუწყობს ხელს. ,,ეს არ იქნება გამოკითხვა მხოლოდ პრობლემების შესახებ, ეს იქნება საზოგადოების შეფასება, თუ სად ხედავენ სუსტ წერტილებს, რა მოსწონთ, რა აწუხებთ და ამას განვსაზღვრავთ ხარისხობრივად, - აღნიშნა დავით სერგეენკომ.

„გლობალური ალიანსის“ პრეზიდენტის, ჟან–ელი მალკინის განცხადებით, გამოკითხვის შედეგად შესაძლებელი გახდება, ჯანდაცვის სფეროში არსებული საკითხების გადასაჭრელად, შესაბამისი გეგმის შემუშავება. „გამოკითხვის შედეგები საშუალებას მოგვცემს, უფრო რეალური და სრულყოფილი გავხადოთ ჩვენი ხედვები და მიდგომები დარგის შემდომი სრულყოფისა და განვითარების საკითხებისადმი და არსებული პრობლემების მოგვარების უფრო რეალური გეგმები შევთავაზოთ სამინისტროს,“- განმარტა ჟან-ელი მალკინმა.

სოციალური ინიციატივა „რა გაწუხებთ?“ ინტერნეტ სივრცეში ვებგვერდზე www.1505.ge კვლავაც გრძელდება. გამოკითხვის შედეგები მარტის ბოლოს შეჯამდება და საზოგადოებას ოფიციალურად წარედგინება.

საერთაშორი სოსაკონსულტაციო ჯგუფი "გლობალური ალიანსი," რომელსაც საფრანგეთის ყოფილი საგარეო და სამგზის ჯანდაცვის მინისტრი, ბერნარ კუშნერი ხელმძღვანელობს, ჯანდაცვის სამინისტროს კონსულტაციებს სისტემის სრულყოფის მიმართულებით უწევს. მომზადებული პროექტები პირველადი ჯანდაცვის რეორგანიზაციის, ხარჯთეფექტურობის გაზრდის, სამედიცინო მომსახურებისა და მედიკამენტებზე ხელმისაწვდომობის ამაღლების, ჯანდაცვის ევროპულ ნორმებთან და კანონმდებლობასთან ინტეგრაციის, ასევე მართვის ევროპული სტანდარტების დანერგვის საკითხებს ითვალიწინებს. ამჟამად დოკუმენტების ქართულ ენაზე თარგმნა მიმდინარეობს, რის გამოც ,,გლობალურ ალიანსთან" ხელშეკრულება მთავრობის გადაწყვეტილებით 1–ელ მაისამდე გაგრძელდა.