„გაზის სამხრეთის დერეფანი“, რომელიც ევროპის ენერგეტიკულ რუკას შეცვლის

პოლიტიკა - 20:08, 29 Feb, 2016

2614

აზერბაიჯანის დედაქალაქ ბაქოში გამართულ „გაზის სამხრეთის დერეფნის“ საკონსულტაციო საბჭოს მინისტერიალზე ხელი მოეწერა ერთობლივ დეკლარაციას, სადაც აღნიშნულია, რომ პროექტის მონაწილეები გააგრძელებენ გრძელვადიან სტრატეგიულ თანმამშრომლობას აირის მწარმოებელ, მომხმარებელ და სატრანზიტო ქვეყნებთან, რისი მიზანიცაა ევროპული ბაზრის ბუნებრივი აირით უსაფრთხო, საიმედო და თანმიმდევრული უზრუნველყოფა.

დოკუმენტს ხელი 12-მა ქვეყანის ენერგეტიკის მინისტრმა მოაწერა, მათ შორის კახი კალაძემ. ხელმოწერას ესწრებოდნენ აზერბაიჯანის პრეზიდენტი ილჰამ ალიევი, ევროკავშირის უმაღლესი წარმომადგენელი პოლიტიკასა და საგარეო საქმეებში, ფედერიკა მოგერინი და ევროკომისიის ვიცე პრეზიდენტი ენერკეტიკის საკითხებში მაროშ შევჩოვიჩი.

დოკუმენტში მოწონებულია მონაწილე ქვეყნების მიერ პროექტის რეალიზაციის იურიდიული საკითხების მოგვარება. აგრეთვე აღნიშნულია, რომ მოხდება შეფასება იმ შესაძლებლობისა, რომ დერეფანი სამომავლოდ გაფართოვდეს და ევროკავშირის არაწევრი ქვეყნები, მათ შორის ბალკანეთიც მოიცვას.

დეკლარაციაში ასევე აღნიშნულია ეროვნულ და ტრანსნაციონალურ დამფინანსებელთა და საერთაშორისო ფინანსური ინსტიტუტების პროექტში ჩართვის, ასევე სხვა მომწოდებელი ქვეყნების ჩართვის შესაძლებლობაც, რასთან დაკავშირებითაც გაგრძელდება მუშაობა, ორმხრივი და მრავალმხრივი კონსულტაციები სამუშაო ჯგუფებშიც.

შეხვედრას ესწრებოდნენ ასევე აშშ სახელმწიფო დეპარტამენტის, დიდი ბრიტანეთისა და იტალიის მთავრობის წარმომადგენლები.