,,იკითხეთ, როგორ ითხოვდა ელისაშვილის გაზრდილ ხელფასსა და სხვა რამეს“ - რა უთხრეს ბესელიას პატიმრებმა ელისაშვილზე

პოლიტიკა - 12:51, 29 Feb, 2016

4832

ე.წ. კოკაინის ხმაურიანი საქმე და ბესელია-ელისაშვილის დაპირისპირება ისევ გრძელდება. პარლამენტის ადამიანის უფლებათა დაცვის კომიტეტის თავმჯდომარე ამბობს, რომ ალეკო ელისაშვილი მატყუარა პოლიტიკოსად ჩამოყალიბდა. ,,ვერაფერს ასაბუთებს, ამიტომ გაექცა ჩემთან ღია ეთერში შეხვედრას“ - ამბობს ეკა ბესელია ,,კვირის პალიტრასთან“ და დასძენს, რომ ეს არის პოლიტიკური ოპონენტების დახმარებით ,,უნიჭოდ დადგმული სცენა“. ბესელია ელისაშვილს კომიკურ პიროვნებას უწოდებს, რომლის საქმეზეც, დეპუტატის თქმით, ყველა იცინის.

,,ელისაშვილი ვითომ წესიერი კაცის იმიჯს ირგებს. აბა იკითხეთ საკრებულოში, როგორ ითხოვდა გაზრდილ ხელფასსა და სხვა რამეებსაც. გარდა ამისა, ბევრი წერილი მივიღე მისი საქმიანობის შესახებ პატიმრებისგანაც“ - აცხადებს ეკა ბესელია.

რაც შეეხება ელისაშვილისა და ზაუტაშვილის შეხვედრას და ფიქრობს თუ არ დეპუტატი, რომ შესაძლოა, ორივე მის წინააღმდეგ ამოქმედდეს, ბესელია ამბობს, რომ ელისაშვილი ცრუობს, ,,ადვოკატისგან ცნობილია, რომ ელისაშვილი ანასტასია ზაუტაშვილს ორჯერ შეხვდა და ბოდიშიც მოუხადა, რომ ცრუ განცხადებებით მართლაც დიდი ზიანი მიაყენა. რატომ შესთავაზა თავისი მეგობარი ადვოკატი მალხაზ ჯანგირაშვილი, ნინო ჯანგირაშვილის ძმა?“ - აცხადებს ეკა ბესელია.