ნარკოტრეფიკისთვის მალაიზიაში დაკავებული ბაბუცა გორდაძე საქართველოში დაბრუნდა

ნარკოტრეფიკისთვის მალაიზიაში დაკავებული ბაბუცა გორდაძე საქართველოში დაბრუნდა - რუსთავი 2-ის ექსკლუზივი

პოლიტიკა - 21:29, 28 Feb, 2016

13013

მალაიზიაში ნარკოტრეფიკის ბრალდებით დაკავებული ბაბუცა გორდაძე თბილისში სავარაუდოდ ბაქოდან 19:00 საათისთვის ჩამოვიდა. რამდენიმეწლიანი პატიმრობის შემდეგ სამშობლოში დაბრუნებული ქალბატონი კომენტარს არ აკეთებს. ბაბუცა გორდაძის ოჯახის წევრები კამერების დანახვისას ჟურნალისტების მიმართ აგრესიულად განწყობილი იყვნენ და კამერების დამტვრევითაც იმუქრებოდნენ.

ბაბუცა გორდაძე დარეჯან კოხტაშვილთან ერთად 6 წლის წინ მალაიზიაში ნარკოტიკების შეტანის ბრალდებით დააკავეს. დარეჯან კოხტაშვილს აეროპორტში ბარგში სურათის ჩარჩოში 5 კილოგრამამდე ამფეტამინის შემცველი აბები აღმოუჩინეს.

მალევე სამართალდამცავებმა კიდევ ერთ მოქალაქეს, ბაბუცა გორდაძეს მიაკვლიეს, რომელსაც კოხტაშვილის მსგავსად ასევე სურათის ჩარჩოში დამალული იგივე შემცველობის აბები უპოვეს. ორივე ქალბატონს მალაიზიის სასამართლომ სიკვდილით დასჯა მიუსაჯა.

მოგვიანებით თურქეთიდან დაბრუნდა და სამართალდამცველებს საკუთარი ნებით ჩაბარდა ბაბუცა გორდაძის მეუღლე, რომელმაც განაცხადა, რომ ორივე ქალბატონს ნარკოტიკები ისე ჩაუდო, რომ მათ ამის შესახებ არაფერი იცოდნენ.

მალაიზიის სასამართლომ საპროცესო გარიგების საფუძველზე როგორც კოხტაშვილს, ასევე გორდაძეს სასჯელი შეუმსუბუქა.

საბოლოოდ სხვადასხვა გარემოებების გათვალისწინებით გადაწყდა, რომ 2016 წელს ორივე გათავისუფლდებოდნენ და სამშობლოში დაბრუნდებოდნენ.

წყარო: rustavi2.com