შემკვეთიც და შემსრულებელიც გვისმენს და ვპირდები, რომ ვერსად დაიმალებიან- ირაკლი ალასანია

პოლიტიკა - 22:05, 27 Feb, 2016

2640

ირაკლი ალასანიას განცხადებით, ალექსი პეტრიაშვილზე თავდასხმა ნიშნავს მთელ პარტიაზე თავდასხმას. ამის შესახებ ”თავისუფალი დემოკრატების” ლიდერმა ”რუსთავი2”-ის ეთერში ისაუბრა. ალასანიას თქმით შემკვეთსაც და შემსრულებელსაც პასუხისმგებლობა მოუწევთ:

”შემკვეთიც და შემსრულებელიც გვისმენს და ვპირდები, რომ ვერსად დაიმალებიან, ვიპოვით და მათ მოუწევთ პასუხისგება ამ ბარბაროსულ, ცინიკურ მკვლელობის მცდელობაზე. როგორი ადამიანი უნდა იყო რომ მეგობრის საფლავზე ასულ ადამიანს ჩაუსაფრთდე, ლაჩრულად, ზურგიდან მიხვიდე, თავში ჩაარტყა და შემდეგ დაგდებული დაცხრილო. ასეთ ხალხთან გვაქვს საქმე,“ - განაცხადა ირაკლი ალასანიამ.

ირაკლი ალასანიას შეფასებით, ალექსი პეტრიაშვილის დაჭრასთან დაკავშირებთ უმრავლესობის ზოგიერთი წევრის მიერ გაკეთებული განცხადებები და მათ მიერ გაჟღერებული ვერსია პირად მოტივებზე, ტოვებდა შთაბეჭდილებას, რომ ეს განცხადებები წინასწარ განზრახული იყო:

„დეპუტატებს წინასწარ განზრახული განცხადებები ჰქონდათ და გადაჰქონდათ სხვა მიმართულებით ისრები, რაც ტოვებდა შთაბეჭდილებას, რომ წინასწარ იყო მესიჯები დაგზავნილი. ეს არასწორი და ამორალური ნაბიჯია მათი მხრიდან. ეს უღირსი საქციელია,“ - განაცხადა ირაკლი ალასანიამ.