ალექსი პეტრიაშვილის თანაგუნდელი „თავისუფალი დემოკრატების“ გენერალურ მდივანზე თავდასხმის საქმის მკვლელობის მცდელობად გადაკვალიფიცირებას ითხოვს. თავდასხმის დეტალებზე გია ცაგარეიშვილმა დღეს ჟურნალისტებთან ისაუბრა. მისი თქმით ალექსი პეტრიაშვილი ლევან მიქელაძის სასაფლაოზე მარტო ავიდა, იქ კი ოჯახის ჭირისუფლები და მეგობრები დახვდნენ:

„სულ სასაფლაოზე იყო 4 ადამიანი, სამი თვითმხილველი, რომელიც გუშინ იყო დაკითხული, საიდანაც ერთ-ერთი ბუკვალურად გადაეფარა პეტრიაშვილს და მასაც მოუღერეს იარაღი. იმის შემდეგ რაც უმოწყალოდ იყო ნაცემი ჩაქუჩით და ბეისბოლის ბიტით, განხორციელდა რამდენიმე გასროლა, სამი მოხვდა მუცლის არეში. შემდეგ დამნაშავეები მიიმალნენ, საით გაიქცნენ და ელოდებოდათ თუ არა ვინმე არ ვიცით. ორნი იყვნენ ერთი ათლეტური აღნაგობიოს მაღალი მამაკაცი და მეორე შედარებით დაბალი . შედარებით დაბალს ეკავა იარაღი და ჯოხი. მეორეს კი ჩაქუჩი. პირველი დარტყმა ამ მაღალმა განახორციელა ჩაქუჩით კეფის მიდამოში. იმის შემდეგ რაც დაეცა, ბეისბოლის ბიტას ურტყამდნენ და განახორციელეს გასროლა“- განაცხადა გია ცაგარეიშვილმა.