"თოფაძე არ მაინტერესებს, არ მიკვირს აგრესია, მათგან რომლებიც სტალინს ეტრფიან"- თინა ხიდაშელი

პოლიტიკა - 21:31, 26 Feb, 2016

2797

თავდაცვის მინისტრის თინათინ ხიდაშელის განცხადებით, "გოგი თოფაძე არ აინტერესებს". როგორც მინისტრმა "ტვ. პირველის" ეთერში "მრეწველების" ლიდერების მიერ ბოლო დროს გაკეთებული განცხადებების კომენტირებისას აღნიშნა, რომ მას "უნდა, ზურაბ ტყემელაძემ საჯაროდ თქვას, რას ფიქრობს სტალინზე და "ნატოზე".
"გოგი თოფაძე არ მაინტერესებს. თოფაძეს მრეწველები გამეიჯნებიან თუ არა არ მაინტერესებს. ეს არის მათი პირადი ინდივიდუალური საქმე. ზურაბ ტყემალაძესა და გოგი თოფაძეს ბევრი წლის მეგობრობა აკავშირებთ და მე არ მაქვს მორალური უფლება. იმის უფლებას ჩემს თავს არ მივცემ, რომ ზურაბ ტყემალაძეს მოვუწოდო გაემიჯნოს გოგი თოფაძეს, მაგრამ სხვა რამის უფლებას ვაძლევ ჩემს თავს. მე მინდა, ზურაბ ტყემელაძემ საჯაროდ თქვას, რას ფიქრობს სტალინზე, მინდა, რომ ზურაბ ტყემალაძემ საჯაროდ თქვას, ფიქრობს თუ არა ისიც, რომ ნატო არის აგრესიული სამხედრო გაერთიანება. ამ თემებზე, დიახ, მე მაინტერესებს ჩემი მეგობარი გაგა კახიანის აზრიც, რომელიც ამ ფრაქციის წევრია"- აღნიშნა თინათინ ხიდაშელმა.

მისი თქმით, გასაკვირი არ არის, რომ იმ ადამიანებს, რომლებიც სტალინს ეტრფიან, მის მიმართ აგრესია აქვთ.

"არ მიკვირს ადამიანებს, რომლებიც სტალინს ეტრფიან, იმავდროულად ჰქონდეთ აგრესია ჩემს მიმართ. პირიქით რომ იყოს გასაკვირი ის იქნებოდა.როგორ შეიძლება სტალის ეტრფოდე, გქონდეს განცდა, რომ ყველა კაბინეტში სტალინის სურათებს დავიკიდებთ და ამასობაში მოგწონდეს ხიდაშელი. შეიძლება რაღაც დროის განმავლობაში, პოლიტიკური კონიუქტურიდან გამომდინარე თავს იკავებდე, მაგრამ რაღაც დროის შემდეგ ნერვებმა რომ გიმტყუნოს გასაკვირი არ არის. როგორც ჩანს ასეთი მომენტი დაუდგა ამ ბატონს. ამიტომაც არ შევპასუხებივარ" - განაცხადა თინა ხიდაშელმა "ტვ. პირველის" ეთერში.