დანაშაულის დაუსჯელობა მძიმე დანაშაულს იწვევს - დიმიტრი შაშკინი ხელისუფლების პასუხისმგებლობაზე საუბრობს

პოლიტიკა - 18:10, 26 Feb, 2016

2558

თავდაცვის ყოფილი მინისტრი "თავისუფალი დემოკრატების" გენერალური მდივნის დაჭრის ფაქტს ეხმაურება.

დიმიტრი შაშკინის განცხადებით, ოპოზიციის ერთ-ერთ წევრზე თავდასხმა ხელისუფლების მხრიდან დანაშაულის დაუსჯელობის შედეგია.

"კრიმინოლოგიაში არის ერთი მარტივი კანონი, ამას დაგიდასტურებთ ნებისმიერი იურიდიული ფაკულტეტის სტუდენტი. დანაშაულის დაუსჯელობა და მითუმეტეს მისი წახალისება უფრო მძიმე და უფრო ხშირი დანაშაულის ჩადენას იწვევს - ეს არის ძალიან მარტივი კანონი. ჯინი ბოთლიდან სწორედ ამ ხელისუფლებამ გამოუშვა მაშინ, როდესაც ფიზიკური შეურაცხყოფა მიაყენეს დეპუტატ თაქთაქიშვილს, ზურაბ ჭიაბერაშვილს, თავდასხმა მოახდინეს დეპუტატ ნუგზარ წიკლაურზე. ქვეყნის ყველაზე დაცულ ობიექტში აეროპორტში თავს დაესხნენ ლევან ბეჟაშვილს"- აღნიშნა დიმიტრი შაშკინმა.

თავდაცვის ყოფილი მინისტრის თქმით, ქვეყანაში კრიმინალური მდგომარეობის გაუარესებაში პასუხისმგებლობა მოქმედ ხელისუფლებას ეკისრება.

"მარტო უახლოესი თვეების განმავლობაში უამრავი მკვლელობისა და შეიარაღებული თავდასხმის ფაქტები დაფიქსირდა. პროკურორის მკვლელობას, მეორე პროკურორის მანქანის დაცხრილვას, პოლიციელების მკვლელობა - ეს ყველაფერი მეტყველებს იმაზე, რომ ხელისუფლება ვერ უმკლავდება კრიმინალს და ხშირ შეთხვევაში ძალადობას ახალისებს.

"როდესაც შენ ძალადობას მიმართავ გარდაბანში არჩევნების დროს მზად უნდა იყო რომ ძალადობა სხვა რეგიონებშიც იქნება. დღევანდელი დანაშაულიც არის იმ ძალადობის წახალისების შედეგი რომელსაც ჩვენ ვხედავთ ბოლო სამი წლის განმავლობაში"- დასძინა შაშკინმა.