,,არ გადასცე კადიევი რუსეთს!“ - ,,აფხაზთა კრება“ დღეს დევნილთა სამინისტროსთან აქციას გამართავს

პოლიტიკა - 12:11, 23 Feb, 2016

2281

,,აფხაზთა კრებაში“ შემავალი ორგანიზაციები 23 თებერვალს დევნილთა და განსახლების სამინისტროსთან აქციას გამართავენ, სახელწოდებით - ,,უბედურების ზონა N3“, ,, არ გადასცე კადიევი რუსეთს! “.

დაგეგმილ აქციასთან დაკავშირებით ,,აფხაზთა კრების“ საორგანიზაციო ჯგუფი განცხადებას ავრცელებს:

,,მიკაილ კადიევი იდევნება რუსეთის ხელისუფლების მიერ თავისუფალი აზრის, მრწამსის და სამოქალაქო აქტიურობის გამო. ის წლების განმავლობაში ამხელდა რუსეთის ძალოვნების აღვირახსნილ თვითნებობებს დაღესტანში, იყო ორგანიზატორი და მონაწილე საპროტესტო აქციების, არის დაღესტნის დამოუკიდებლობის მომხრე. რუსეთის ხელისუფლებისაგან დევნის გამო, ის იძულებული გახდა დაეტოვებინა დაღესტანი და თავი შეაფარა საქართველოს. რუსეთში მის წინააღმდეგ აღძრულია სისხლის სამართლის საქმე ყალბი ბრალდებით და ითხოვს უფლებადამცველის ექსტრადირებას, რათა ფიზიკურად გაუსწორდნენ. საქართველოს ლტოლვილთა და განსახლების სამინისტრომ ორჯერ უთხრა უარი მ.კადიევს ლტოლვილის სტატუსის მინიჭების თაობაზე, რაც დაიცავდა მას ექტრადიციისაგან. საქართველოს ხელისუფლება აპირებს მის გადაცემას. ამჟამად, საქმე ხელმეორედ არის სასამართლოში. ძალიან რეალურია, რომ საზოგადოებრივი აქტივობის გარეშე, პროცესი წარიმართება მტრისთვის სასურველი მიმართულებით.

2016 წლის 23 თებერვალს, რუსეთის საბჭოთა იმპერიის მიერ კავკასიის ხალხების დეპორტაციის დღეს, 14 საათზე, აფხაზთა კრების ორგანიზაციები ვაწყობთ საპროტესტო აქციას, - ,,უბედურების ზონა N3“, - საქართველოს ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების სამინისტროსთან (მისამართი: თბილისი, თამარაშვილის ქ. N 15ა, მეტრო “დელისის” მიმდებარედ, შესასვლელი ყაზბეგის ქუჩიდან)“ - ნათქვამია აფხაზთა კრების საორგანიზაციო ჯგუფის განცხადებაში.